Dasma kjo festë e madhe e cila ndër vite ka humbur shumë nga tradita mbetet një ndër momentet më të bukura të jetës së njeriut. Por dasma është edhe kulturë e traditë e një kombi. Ceremonia dhe ritet në vendin tonë kanë qënë të “shenjta”, martesa në traditën popullore shqiptare është konsideruar nga zakonet më të dëshiruara, një zakon gëzimi. Dasmat e dikurshme tradicionale zgjasnin tri ditë e netë dhe organizoheshin për të marrë nusen ditën e hënë ose të enjte. Dasma tradicionale organizohej në shtëpinë e dhëndrit, dhe kënaxheçi në shtëpinë e vajzës, ndërsa në ditët e sotme dasmat organizohen në lokale publike me arredime marramendëse. Marrja e nuses me kalë apo qerre të mbuluara pothuajse është një e shkuar. Sot shumë tradita kanë ndryshuar, megjithatë sa herë i kthehemi të shkuarës gjithmonë e më shumë na pëlqen ajo që duhet të mundohemi gjithmonë ta ruajmë! Të ftuarit në “Rreze Dielli” Natasha Mio, Skënder Allkoçi dhe Ridvan Koliçaj, kujtojnë plot emocion e nostalgji traditat dhe zakonet e harruara të dasmave nga veriu në jug - hyrja në oborr e dhëndrit, çasti i zbritjes së nuses, thyerja e rrugës nga krushqit, shoqërimi i nuses nga vëllezërit e saj, grushtimi në shpinë nga i vëllai, vaji i nuses, prekja tri herë me dorë e ballit të derës, etj…