Prindërit e 15-vjeçarit Aleksandër Xhema, Artur dhe Eljona, kanë trokitur në dyert e redaksisë së emisionit “Pa Gjurmë” për të denoncuar bullizimin e vazhdueshëm që, sipas tyre, djali i përjeton prej kohësh në shkollën “Zihni Toska” në Berat. Ata shprehen se, pavarësisht ankesave të shumta, asnjë masë nuk është marrë nga stafi pedagogjik. Sipas familjes, Aleksandri ka përsëritur dy herë klasën e gjashtë. Një vit i është humbur krejtësisht, pasi dëftesa nuk është shfaqur në aplikacionin e-Albania, duke e lënë pa të drejtën e vijueshmërisë normale shkollore. Prindërit tregojnë se janë drejtuar disa herë te drejtoresha e shkollës, Tatjana Hoxha, por shprehen se eprorja e këtij institucioni nuk u ka dhënë asnjë përgjigje apo zgjidhje për rastin në fjalë. E vetmja zgjidhje ka qenë përsëritja e vitit shkollor. Prindërit e Aleksandrit shkojnë edhe më tej, duke akuzuar drejtoreshën për ushtrim dhune ndaj djalit të tyre brenda institucionit arsimor, pa asnjë justifikim. Sot, Aleksandri ndjek klasën e tetë, ndërsa prindërit kërkojnë ndërhyrjen e institucioneve përgjegjëse për të garantuar sigurinë, mirëqenien dhe të drejtën e djalit të tyre për arsim të sigurt e dinjitoz, si të gjithë bashkëmoshatarët e tij.