Kronikë

26 shqiptarë, të cilët nuk kishin leje-qëndrimi në Angli janë deportuar drejt Shqipërisë. Lajmi është bërë i ditur nga zyra e Departamentit të Brendshëm të Britanisë së Madhe.

Një aksident ka ndodhur në rrugën ‘Burrel-Klos’. Mësohet se janë plagosur gjashtë persona, mes tyre dy drejtues mjetesh dhe katër pasagjerë. Aksidenti ka ndodhur në vendin e quajtur ‘Shkëmbi i Kuq’.

2 persona janë arrestuar në Fier pasi kanë dhunuar fizikisht prindërit e tyre.

Një operacion i gjerë policor pas marrjes në dorë të dëshmive kyçe të Nuredin Dumanit dhe 2 të penduarve të drejtësisë, zbuloi një grup të strukturuar kriminal të drejtuar nga Plarent Dervishaj, përfshirë në atentatin e prokurorit Arjan Ndoj 3 vite më parë. Në pranga ranë 5 bashkëpunëtor, mes të cilëve edhe një agjent doganor, dhe në kërkim u shpall koka që organizoi gjithçka, Plarent Dervishi që drejtonte bandën me miq e familjarë, dhe aktualisht ndodhet në Dubai.

Tre shtetas turq janë arrestuar nga policia e Tiranës në aeroportin e Rinasit ku po tentonin të udhëtonin me dokumente të falsifikuara.

Moti i keq me reshje shiu dhe dëbore kanë përfshirë të gjithë territorin e vendit gjatë orëve të fundit. Kjo ka sjellë përkohësisht bllokimin e rrugës së Arbrit, ndërsa më pas është linuar. Vijon pezullimi në 2 shkollat në Lezhë, oborret e të cilave ishin të mbuluara nga uji një ditë më parë. Moti i keq ka pezulluar edhe lundrimin nga Durrësi në Bari dhe anasjelltas. Shkak është bërë stuhia detare, ndërsa pritet që lundrimet të nisin ditën e nesërme.