POP 5

Lajmet më të lexuara të 5 minutave të fundit

Kronikë

Drejtorja e SHÇBA: Hetim ish-policit Nuhu për 5 shkelje, videot rrëzojnë pretendimet e tij

Drejtorja e SHÇBA, Anila Trimi thotë se ish-oficeri i policisë, Emiljano Nuhu do hetohet për 5 shkelje. Nuhu akuzoi se është kërcënuar me jetë në zyrë në prani të deputetëve Rrahman Rraja dhe Taulant Balla, por videot rrëzojnë pretendimet e tij.

TIRANE - Drejtorja e SHÇBA, Anila Trimi ka përgënjeshtruar akuzat e ish-oficerit të policisë së Fushë Krujës, Emiljano Nuhu, lidhur me pretendimet se është kërcënuar me jetë në zyrën e tij, brenda stacionit të policisë së Fushë Krujës. Trimi tha se pas verifikimeve dhe shqyrtimit të pamjeve filmike, ka rezultuar se personat e pretenduar nga Nuhu nuk kanë qenë të pranishëm në datën 21 korrik në ambientet e policisë. 

Ish-oficeri i policisë i cili tashmë është larguar jashtë vendit, akuzoi se është kërcënuar me jetë në zyrën e tij në prani të deputetëve Taulant Balla dhe Rrahman Rraja, për të liruar nga arresti djalin e këtij të fundit, Rexhep Rraja, i cili ishte paditur nga ish e dashura Xhisiela Maloku, për ushtrim dhune. Por sipas verifikimeve të kryera nga SHÇBA, në këtë datë as efektivi Emiljano Nuhu nuk ka qenë i pranishëm në ambientet e stacionit të policisë. Gjithashtu, pamjet filmike në një lokal dhe komunikimet telefonike të Emiljano Nuhut me një prej të akuzuarve prej tij, tregojnë se dy personat kishin njohje dhe gëzonin raporte miqësore. 

Sipas SHÇBA, Emiljano Nuhu ka braktisur detyrën në Policinë e Shtetit në datën 14 shtator dhe është larguar drejt Prishtinës. Por ai nuk rezulton i regjistruar në sistemin TIMS as në hyrje dhe as në dalje, çka ngre dyshimet për kalim të paligjshëm të kufirit. Për kreun e SHÇBA, ish-efektivi Nuhu ka konsumuar pesë shkelje si shpërdorim detyre, kalim i paligjshëm i kufirit, nxjerrje e sekretit hetimore, shkelja e procedurave të punës në hetimin e çështjeve si dhe shkelja e rregullave mbi armatimin personal të punonjësit të Policisë së Shtetit, shkelje për të cilat kanë nisur hetimet.

Në momentin e braktisjes së detyrës, Nuhu nuk ka dorëzuar as armën. Ai ka telefonuar nga jashtë shtetit një kolegun e tij që të shkojë të shtëpia e vjehrrit dhe të marrë pistoletën e shërbimit për ta dorëzuar në polici. 

Deklarata e drejtoreshës së SHÇBA, Anila Trimi:
Jam sot këtu para jush për t’ju bërë me dije se SHÇBA ka filluar dhe është ne vijim të një hetimi të thellë dhe të detajuar të të gjitha pretendimeve dhe deklaratave të bëra publike nga ish-punonjësi i Policisë së Shtetit Emiljano Nuhu, të bëra publike nëpërmjet një interviste të transmetuar në media. 

Në përmbushje të detyrave institucionale, SHÇBA monitoron ligjshmërinë e të gjitha veprimeve apo mosveprimeve të punonjësve të Policisë së Shtetit gjatë ushtrimit të detyrës. Menjëherë me transmetimin në media të pretendimeve dhe deklaratave të ish-punonjësit Nuhu, SHÇBA krijoi një grup hetimor të posacëm të drejtuar nga unë, si Drejtor i Përgjithshëm, Altin Curri, shef i sektori ne Drejtorinë e Përgjithshme të SHÇBA, Arben Frasheri Drejtor i SHÇBA Tiranë, Fatos Balla, Shefi i Sektorit te Hetimit SHÇBA Tirane dhe Melsi Agolli Shefi i Sektorit SHÇBA Durrës

Deri në këtë moment, grupi i hetimit:

1.    Ka shqyrtuar një sërë dokumentesh që mund të kenë të dhëna për çështjet e pretenduar, përfshirë librin e shërbimit të Stacionit të Policisë Fushë Krujë, Urdhrin e Prokurorit të Rrethit Gjyqësor Krujë për kryerje veprimesh hetimore, urdhrin e brendshëm për planëzimin e shërbimit të këtij stacioni dhe librin e denoncimeve të qytetarëve.
2.    Ka marrë në intervistë më tepër se 20 punonjës policie, në Krujë, Tiranë dhe Berat përfshirë drejtuesit e këtyre strukturave, të cilët mund të kishin dijeni të ngjarjeve të ndodhura në datat dhe vendet e pretenduara nga Emiljano Nuhu.
3.    Ka marrë në shqyrtim pamje filmike të bizneseve private në Fushë Krujë dhe Tiranë me qëllim verifikimin e pretendimeve të ish punonjesit Emiljano Nuhut.
4.    Ka administruar fashikuj hetimi, fashikuj procedimi dhe gjithë korrespondencën ndërmjet Komisariateve Krujë dhe Komisariatit 6 ne Tiranë dhe Prokurorive të Rretheve Gjyqësore Krujë dhe Tiranë, për këtë çështje.
5.    Ka kryer kontrolle në sistemin TIMS dhe sistemet e tjera të Policisë së Shtetit.

Nga ky aktivitet, deri tani janë verifikuar disa rrethana dhe fakte:
1.    Nga intervistat e drejtuesit dhe punonjësve të Policisë së Stacionit Fushë Krujë rezulton se më datë 21/07/2018, pra data e pretenduar, nga ish punonjesi Nuhu nuk ka qenë fare prezent në ambientet e Stacionit të Policisë Fushë Krujë.
2.    Nga Urdhri i Brendshëm për planëzimin e shërbimit, rezulton se, më datë 21/07/2018, Emiljano Nuhu nuk ka qenë OPGJ i gatshëm, por një tjetër punonjës i Policisë së Shtetit.
3.    Nga intervistat dhe dokumentet si dhe shqyrtimi i pamjeve filmike në dispozicion, nuk rezulton që personat e përmendur në intervistë, si kërcënues të tij, të kenë qenë prezent në ambientet e Stacionit të Policisë së Shtetit në fushe Krujë, as në këtë datë dhe as në ndonjë datë tjetër të mëvonshme.
4.    Nga Urdhri i Prokurorit të Rrethit Gjyqësor Krujë, rezulton se vetëm në datë 27/07/2018, Emiljano Nuhu është ngarkuar për hetimin e kësaj çështjeje. 
5.    Nga shqyrtimi i fashikullit të hetimit rezulton se nga 11 veprime hetimore të deleguara nga Prokurori i çështjes, Emiljano Nuhu ka kryer vetëm 4 prej tyre.
6.    Nga ekzaminimi i pamjeve filmike dhe komunikimeve elektronike, rezulton se Emiljano Nuhu takohet, ndër të tjerë, me personin nën hetim, në ambientet e një lokali privat, në Tiranë më datë 30/07/2018. Nga pamjet dhe komunikimi elektronik krijohet bindja e një takimi mes personash të njohur, mgjate kjo eshte nje rrethane qe do te verifikohet nga organet qe udheheqin hetimin ne kete rast.
7.    Nga dokumentet rezulton se Emiljano Nuhu nuk paraqitet në detyrë që nga data 14/09/2018.
8.    Më datën 15/09/2018, Emiliano Nuhu, rezulton të ketë udhëtuar nga aeroporti i Prishtinës drejt një vendi të Bashkimit Europian. Në sistemet e Republikës së Shqipërisë apo ato të Republikës së Kosovës, Emiliano Nuhu nuk rezulton i regjistruar në hyrje-dalje, në asnjërën nga Pikat e Kalimit Kufitar Shqiptare apo Kosovare.
9.    Me datën 16.09.2018, Emiliano Nuhu, i ka telefonuar nga jashtë Shqipërisë, punonjës policie, të cilit i ka kërkuar të marrë armatimin personal, pistoletë, te cilen e kishte lene tek vjehrri i tij, për ta dorëzuar më pas.

Nga shqyrtimi i rrethanave të deritanishme, ekziston dyshimi i arsyeshëm se ish-punonjësi i Policisë Emiljano Nuhu, me veprime dhe mosveprime, ka kryer disa shkelje si:

1.    Shpërdorim detyre
2.    Kalim i paligjshëm i kufirit
3.    Nxjerrje e sekretit hetimore
4.    Shkelja e procedurave të punës në hetimin e çështjeve
5.    Shkelja e rregullave mbi armatimin personal të punonjësit të Policisë së Shtetit

SHÇBA po shqyrton me imtësi të gjitha rrethanat e tjera, pretendimet si dhe ligjshmërinë e të gjitha veprimeve apo mosveprimeve të këtij ish-punonjësi policie, të personave të lidhur me të si dhe veprimet apo mosveprimet e eprorëve të tij. Në përfundim të hetimeve do t’ju bëhen me dije rezultatet, referimet dhe propozimet e masave përkatëse të punonjesve nese do te rezultojne me shkelje. 

Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • bledi 1: 29/09/2018 09:35

    bravo policia.... PD bashk me opoziten ... po mundohet me filmime me njerez te zhytur ne korrupsion te bej popullin te ngrihet ne revolt.... ptuhhhh ne nuk ju njohim nga dje por 28 vjet... burg kush i ben babalet... se po mar filmat comedy inat duke par opoziten

    Përgjigju
  • merita: 29/09/2018 09:21

    O ti zonje qe do te mbulosh diellin me balte se ashtu te kane detyruar .Emiljano Nuhu nuk pretendon as vete dt 21 por daten 27 korrik.Hapini kamerat dhe vertetoni prezencen e atyre qe e kane kercenuar dhe nuk e kane lene me be detyren.Nejse ti je per te ardhur me keq se per Xhisielen.

    Përgjigju
  • Fredi: 28/09/2018 23:13

    Kjo duket vete qe eshte femer e dhunuar. Merruni me vajzen, sigurojini mbrojtje dhe jepini mbeshtetje publike pa hetimet tuaja dihen si behen.

    Përgjigju
  • Akrepi: 28/09/2018 22:35

    Vertet mendoni se nje polic do i a hedhe gjith nje pushteti.Pa le dhe na denancon ne popull,se paskan cierr nje vajze.Po ne miremi me pune te medha ,more derdemen,s'mund te miremi me polic e me cuplina.Po ti te kemi ushqier more zullumqar,sa te cirrej barku,jeni mosmirnjohes.Pa le qe na akuzon,per pa aftesie, per korrupsion ,po ne japim dhe jeten per drejtesi.Ja ti o polic ke nj ser shkeliesh,1-Shperdorim detyre,2 Ke mar frym pa leje,3 Ke kundershtuar plumbin kokes,etj .Do me per policine e shqipetareve.

    Përgjigju
    • Boni: 29/09/2018 12:43

      Artan Hoxha e zbardhi thote.... po czbardhi artan hoxha ore....artan hoxha e nxiu e katranosi me keq se ceshte kete ceshtje.... pse nuk thote artan hoxha se rajat jane famlje mafioze dhe ne krye te piramideskane deputet ne parlament...

    • Bako: 29/09/2018 09:19

      Ore Akrep eshte mir te shkruash shqip. Dhunimi i nji femre ne thelb qendron por ajo qe nuk mund te pranohet eshte spekullimi. Eshte per tu pergezuar gazetari Hoxha per zbardhjen e te vertetes.

  • Sondazhi i ditës:

    Kë doni ju që të fitojë zgjedhjet në SHBA?

Lajme të tjera



×

Lajmi i fundit

NBA/ Thunder dhe Cavs me pikë të plota, Lakers 'K.O' në Detroit! Fitojnë Golden State dhe Celtics

NBA/ Thunder dhe Cavs me pikë të plota, Lakers 'K.O' në Detroit! Fitojnë Golden State dhe Celtics

5 Nëntor, 13:07