Ryshfet nga krimi për të lejuar beach-bar pa leje, si u ‘shkri’ Policia e Sarandës! Lidhja me pronën e Isuf Jacajt që në 2025-ën u ekzekutua me tritol dhe roli i bandës së Kamzës

Saranda është tronditur nga një skandal që ka prekur drejtpërdrejt kupolën e policisë lokale. Zyrtarë të komisariatit të qytetit bregdetar, dyshohen se kanë mbyllur sytë përballë ndërtimeve pa leje, investime këto nga grupet kriminale, në këmbim të përfitimeve të paligjshme.

Hetimet që zbuluan përfshirjen e shefit të komisariatit të Sarandës, Gëzim Bashllari si edhe tre inspektorë të policisë, Andi Duro, Ajdin Ismailaj dhe Robert Çullaj, nisën pas një denoncimi të mbërritur në adresën elektronike të drejtuesit të Policisë së Shtetit, Skënder Hita, dy ditë më parë.

Bëhet fjalë për një beach bar dhe plazh privat pa leje në vijën bregdetare të Sarandës, në lagjen numër 1, ngjarje kjo, që pasi u zbulua nga policia, çoi në arrestimin e 8 punëtorëve dhe shpalljen në kërkim të pronares, të paktën në letra prej 2022-shit, të stacionit të plazhit, Arjola Dhrami Bajo. Objekti pa leje, u shemb nga IMT-ja.

Por verifikimet e mëtejshme të Agjencisë së Mbikëqyrjes Policore zbuluan se gjithçka kishte ndodhur me dijeninë e zyrtarëve të komisariat, të cilët kanë detyrë të kontrollojnë territorin. Jo vetëm kaq. Ata dyshohet se kanë marrë ryshfet të majmë për ta toleruar këtë ndërtim të paligjshëm.

“CopaCabana Beach’ është beach bar-i dhe stacioni i plazhit në Kanalin e Çukës në Sarandë, përgjatë vijës bregdetare, ku ndodhen gjithashtu disa nga hotelet dhe resortet më të njohura dhe luksoze të qytetit.

Plazhi privat që prej disa vitesh ka qenë i hapur, kur u zbulua nga policia, po përgatitej sërish për sezonin veror, duke ngritur strukturat e drunjta për beach barin dhe vendosjen e shezlongëve e çadrave. 

Foto si dukej Beach-Bari

E njëjta pronë, në zonën më të lakmuar të bregdetit Jon, ka qenë më herët objekt konfliktesh, dhe dyshohet se lidhet edhe me vrasjen me tritol në makinë ndaj Isuf Jaçajt, në tetor të vitit 2025 në Sarandë. 

Hetuesit dyshojnë se pas këtij atentati qëndron një grup kriminal me bazë në Kamëz, i cili ka dyshime se fshihet edhe pas ndërtimit të plazhit privat dhe në të tjera ngjarje kriminale në Sarandë.

I njëjti grup, në vitin 2025, vetëm 3 muaj para atentatit të Isuf Jaçajt, dyshohet se organizoi edhe planin për t’i vrarë të birin, po me tritol në makinë, në korrik të 2025-ës, por i riu, Klaus Jaçaj shpëtoi.

E gjitha, dukej të ishte hakmarrje për një përplasje me armë në Sarandë të 32 vjeçarit Jaçaj, me të njëjtin grup të dyshuar nga Kamza, më 17 korrik 2025. I riu ishte në një krah me Ramadan Zoton, një burrë nga Saranda i cili pretendonte të shfrytëzonte të njëjtin beach bar që sot shkriu komisariatin e Sarandës. Ngjarja çoi në pranga të Klaus Jaçajn, pasi largoi nga vendi i ngjarjes, Zoton, i cili qëlloi me armë. Të plagosur mbetën Gëzim Hajdari dhe Ernest Lami.

Të arrestuarit u pezulluan nga detyra dhe Hita paralajmëriu se po përgatit përjashtimin e tyre nga radhët e policisë.

Shefi i Komisariatit i Sarandës, tashmë i arrestuar, Gëzim Bashllari, përpara hetuesve të AMP-së ka deklaruar se ka qenë i zënë këtë javë me një ngjarje kriminale, vrasjen në fshatin Gjashtë të Sarandës të biznesmenit Rexhep Ismaili më 8 maj, ndaj nuk ka pasur kohë të merret me ndërtimet pa leje.

Ndaj shefit të komisariatit dhe vartësve të tij rëndojnë akuzat për “Shpërdorim detyre”, “Kryerje të veprimeve arbitrare” dhe “Mosmarrje masash për ndërprerjen e gjendjes së paligjshme”, vepra që dyshohet se janë kryer edhe në raste të tjera.

Gjithashtu u pezullua nga detyra edhe Shefi i Krimeve në Komisariatin e Sarandës, Blerim Tafçiu, pasi nuk u paraqit për t’u marrë në pyetje nga AMP gjatë veprimeve hetimore.

-------------------------------
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë

Rendit zhvillimet sipas orarit:

Të Fundit Të Parat