Zgjedhjet në Hungari/ Orban pranon disfatën dhe uron rivalin! Magyar fiton me 2/3 e vendeve në parlament

Fituesi i zgjedhjeve në Hungari, Peter Magyar, ka deklaruar se vendi i tij “do të jetë sërish një aleate e fortë në Bashkimin Evropian dhe në NATO”, gjatë një fjalimi para mbështetësve të tij në Budapest.

Në sheshin Batthyány, ku mijëra qytetarë ishin mbledhur për të festuar rezultatin zgjedhor, turma brohoriste slogane historike si “Ruszkik, haza” (“rusët, shkoni në shtëpi”), një thirrje e njohur nga revolta hungareze e vitit 1956 kundër pushtimit sovjetik.

Në fjalimin e tij, Magyar theksoi se rezultati i zgjedhjeve përfaqëson një kthesë të fortë pro-evropiane.

“Hungarezët kanë thënë po Evropës. Kemi mposhtur një tirani,” deklaroi ai, duke shtuar se votuesit “i thanë jo frikës dhe tradhtisë”.

Ai e përshkroi fushatën si një betejë të pabarabartë, duke thënë se nisi me pak mbështetje, “si Davidi kundër Goliathit”, por që përfundoi me “një fitore historike”.

Lideri i Tisza-s u bëri thirrje edhe atyre që nuk e votuan, duke kërkuar “unitet kombëtar” pas zgjedhjeve.

Në një tjetër deklaratë, Peter Magyar i kërkoi presidentit të Hungarisë Tamas Sulyok që t’i japë “sa më shpejt mandatin për formimin e qeverisë”, dhe më pas të tërhiqet nga detyra e tij.

Ai gjithashtu iu drejtua kryeministrit në largim Viktor Orban, duke i kërkuar që të mos ndërmarrë asnjë veprim që mund të kufizojë hapësirën e veprimit të qeverisë së ardhshme.

“E kemi çliruar Hungarinë, së bashku kemi zëvendësuar regjimin e Orbánit, së bashku e kemi rimarrë atdheun tonë. Kemi fituar një mandat të paprecedentë: jemi gati të arrijmë një shumicë të fortë prej dy të tretash në Parlament. Kalimi do të jetë paqësor dhe i qetë falë një mandati të fortë”.

Këto ishin fjalët e para të kryeministrit të ri hungarez, Péter Magyar, teksa përshëndeste mijëra mbështetës jashtë selisë elektorale të Tisza-s, në zemër të kryeqytetit hungarez Budapest.

“Edhe kancelari gjerman dhe Sekretari i Përgjithshëm i NATO-s na kanë uruar me telefon për fitoren tonë”, bën të ditur në rrjetet sociale Péter Magyar, fituesi i zgjedhjeve parlamentare në Hungari.

Kancelari gjerman Friedrich Merz ka uruar liderin e opozitës hungareze Péter Magyar, për fitoren në zgjedhjet parlamentare, që sollën rrëzimin nga pushteti 16-vjeçar të Viktor Orban.

“Hungaria ka vendosur. Urime për fitoren në zgjedhje, i dashur Péter Magyar. Mezi pres bashkëpunimin për një Evropë të fortë, të sigurt dhe mbi të gjitha të bashkuar”,- shkruan Merz.

Presidenti francez, Emmanuel Macron, ishte ndër liderët e parë evropianë që uroi Péter Magyar për fitoren në zgjedhjet në Hungari. Në një postim në rrjetin X, Macron bëri të ditur se kishte zhvilluar edhe një bisedë telefonike me liderin e opozitës.

“Sapo zhvillova një bisedë me Péter Magyar për ta uruar për fitoren e tij në Hungari. Franca përshëndet triumfin e pjesëmarrjes demokratike dhe përkushtimin e popullit hungarez ndaj vlerave të Bashkimit Evropian dhe rolit të Hungarisë në Evropë”, shkroi ai.

Macron theksoi gjithashtu rëndësinë e bashkëpunimit në të ardhmen: “Së bashku, të çojmë përpara një Evropë më sovrane, për sigurinë e kontinentit tonë, konkurrueshmërinë dhe demokracinë”.

Ndërkohë, presidentja e Komisionit Evropian, Ursula von der Leyen, reagoi menjëherë pas shpalljes së rezultateve, duke e cilësuar këtë moment si historik.

“Zemra e Evropës sonte rreh më fort në Hungari”, shkroi ajo në një mesazh në anglisht dhe hungarisht, duke iu referuar fitores së thellë të Péter Magyar, e cila shënon fundin e një epoke 16-vjeçare të qeverisjes së Viktor Orbán.

“Nuk do të dorëzohemi, do t’i shërbejmë kombit nga opozita”, deklaroi kryeministri në largim Viktor Orbán pasi pranoi humbjen. “Detyra jonë është e qartë: të forcojmë komunitetin tonë.”

Orban humbi zgjedhjet elektorale parlamentare pas 16 vitesh në pushtet.

“Rezultatet janë të qarta, është e dhimbshme për ne”, deklaroi kryeministri në largim hungarez Viktor Orbán, i cili më pas konfirmoi se ka uruar për fitoren partinë e Péter Magyar.

Orban humbi zgjedhjet elektorale parlamentare pas 16 vitesh në pushtet.

Kryeministri në largim, Viktor Orbán, ka uruar Péter Magyar për fitoren. Lajmi është bërë i ditur nga vetë Magyar përmes një postimi në llogarinë e tij në Facebook.

Rezultatet e para nga zgjedhjet në Hungari tregojnë një epërsi të fortë të opozitës. Me 21.5% të votave të numëruara, partia Tisza ka marrë 49.43% të votave.

Ndërkohë, kryeministri Viktor Orbán dhe partia e tij Fidesz ndodhen shumë prapa, me vetëm 41,99%.

Lideri i opozitës dhe sfiduesi i kryeministrit Viktor Orbán, Péter Magyar, deklaroi se pjesëmarrja në zgjedhje ka qenë shumë e lartë dhe se mbi 6 milionë qytetarë kanë votuar

“Edhe një herë, hungarezët bënë histori”, ishin fjalët e para të Magyar pas votimit. “Mbi 6 milionë kanë votuar. Jemi optimistë për rezultatin”.

Ai u bëri thirrje mbështetësve të tij të ruajnë qetësinë dhe të shmangin çdo provokim: “Të qëndrojmë paqësorë, të mos i nënshtrohemi asnjë provokimi”.

Ndërkohë, në Budapest, në sheshin Batthyány, ka nisur pritja e rezultateve në qendrën e Tisza-s. Sipas Magyar, të gjithë janë të mirëpritur: “I bëj thirrje të gjithëve të qëndrojnë të qetë dhe të mos bien pre e asnjë provokimi nga partia në pushtet apo propaganda. Zoti e bekoftë Hungarinë!”, shkroi ai në rrjetin X.

Ai pritet që së shpejti të marrë pjesë në tubimin e mbështetësve të tij në brigjet e Danubit, në kryeqytet.

Pas mbylljes së procesit të votimit në zgjedhjet parlamentare, ku pjesëmarrja arriti shifrën rekord 77.8%, lideri i opozitës hungareze, Péter Magyar, shprehet hapur: «Regjimi po jeton orët e tij të fundit, jemi në prag të një ndryshimi sistemi. Le ta kalojmë së bashku! Të qëndrojmë të gjithë të qetë dhe me humor të mirë: koha është në anën tonë! Zoti e bekoftë Hungarinë!»

Pas mbylljes së qendrave të votimit janë publikuar sondazhet e kryera para zgjedhjeve. Sipas tyre, opozita e udhëhequr nga Tisza parashikohet të marrë 55% të votave, ndërsa Fidesz, partia e Orbánit, rreth 38%.

Sondazhi është realizuar nga 212 Research Centre. Sipas këtij instituti, Tisza mund të fitojë deri në 132 vende nga gjithsej 199 në Parlament.

Gulyás, shefi i kabinetit të kryeministrit hungarez Orbán, deklaron se pjesëmarrja e lartë në votime është rezultat i mobilizimit të Fidesz.

Pjesëmarrje në votimet e këtyre zgjedhjeve parlamentare në Hungari arriti në 77.8%, një rekord historik i paregjistruar më parë. 

Pjesëmarrja në zgjedhjet parlamentare në Hungari ka arritur në 77.8% deri në orën 18:30, duke thyer rekorde historike.

Sipas të dhënave të fundit nga Zyra Kombëtare e Zgjedhjeve, rreth 5.85 milionë qytetarë kanë hedhur votën deri në këtë orë.

Rekordi historik i vitit 2002 është tejkaluar që para mbylljes së votimit, ndërsa vetëm dy orë më herët pjesëmarrja kishte kaluar tashmë 74%.

Për krahasim, në zgjedhjet e vitit 2022 pjesëmarrja në të njëjtën orë ishte 67.8%, çka tregon një rritje të ndjeshme të mobilizimit të votuesve këtë vit.

Ndërkohë, janë raportuar edhe probleme që kanë ndikuar në pjesëmarrje. Në një rast, një tren nga Budapesti drejt Szeged-it pësoi defekt dhe u vonua për më shumë se një orë e gjysmë, duke bërë që disa qytetarë të mos arrijnë në kohë për të votuar.

Në disa zona të vendit janë regjistruar gjithashtu nivele shumë të larta pjesëmarrjeje. Në një qark me qendër në Sopron, pjesëmarrja kishte arritur rreth 80% që në orën 17:00, shumë më e lartë se në zgjedhjet e mëparshme.

Analistët në Hungari vlerësojnë se pjesëmarrja e lartë në zgjedhje mund të sjellë një ndryshim të madh në përbërjen e Parlamentit të ardhshëm hungarez, duke i vënë nën presion partitë e vogla dhe duke e shtyrë vendin drejt një gare gjithnjë e më të qartë mes dy forcave kryesore.

Sipas analistit dhe politikanit Gábor Fodor, dinamika e votimit tregon se vendi po lëviz me shpejtësi drejt një skene politike të dominuar nga dy kampe, ndërsa partitë e vogla po hyjnë në një zonë rreziku. Në vlerësimin e tij, sa më e lartë të jetë pjesëmarrja, aq më shumë rritet mundësia që Parlamenti i ri të ketë një konfigurim dukshëm më të polarizuar.

Fodor thekson se mobilizimi i lartë nuk mund t’i atribuohet automatikisht vetëm njërës palë. Sipas tij, si partia në pushtet ashtu edhe opozita kanë arritur të nxjerrin votuesit në qendrat e votimit, ndërsa një rol të rëndësishëm kanë luajtur edhe zhvillimet emocionale dhe përplasjet e forta të ditëve të fundit të fushatës.

Në këtë kuptim, sipas tij, zgjedhjet nuk po prodhojnë vetëm një rezultat, por mund të shënojnë edhe një riformatim të vetë sistemit politik hungarez.

Kryebashkiaku i Budapestit, Gergely Karácsony, pret një fitore të thellë të opozitës në zgjedhjet parlamentare në Hungari.

Në një intervistë për mediat vendase ai tha se 'një ndryshim i madh po vjen' dhe se pret një humbje historike për partinë në pushtet të Viktor Orban, duke e lidhur këtë me pjesëmarrjen rekord në votime.

“Skenarë të tillë janë gjithmonë të pafavorshëm për një parti që ka qenë në pushtet për 16 vite dhe që paraqitet si zgjedhja e sigurt,” u shpreh ai.

Sipas Karácsony, zgjedhjet janë tashmë të vendosura në një aspekt kyç: opozita e udhëhequr nga Péter Magyar pritet të sigurojë shumicën në Parlament, jo vetëm në vota.

Megjithatë, ai theksoi se mbetet ende e paqartë nëse kjo shumicë do të arrijë nivelin e dy të tretave, që do t’i lejonte opozitës të ndryshonte ligjet kryesore.

Karácsony shtoi se pret një fitore shumë të fortë të opozitës në Budapest dhe tha se ka marrë garanci se në rast fitoreje do të trajtohen problemet e kryeqytetit.

Rezultatet e para të zgjedhjeve parlamentare në Hungari pritet të publikohen pas orës 20:00.

Sipas autoriteteve zgjedhore, Zyra Kombëtare e Zgjedhjeve do të nisë publikimin e rezultateve në varësi të ritmit të numërimit të votave.

Komisionet e votimit do të fillojnë fillimisht me numërimin e votave për kandidatët në zonat elektorale.

Rezultatet paraprake do të publikohen në faqen zyrtare të zgjedhjeve, e cila do të përditësohet çdo 10 minuta.

Në orët e fundit para mbylljes së votimeve, qytetarët në Budapest vijojnë të presin në radhë për të hedhur votën, në një shenjë të pjesëmarrjes së lartë në zgjedhjet parlamentare.

Pamjet vijnë nga një qendër votimi në zonën Gazdagrét, ku radhët e votuesve janë ende të gjata, ndërsa procesi po i afrohet fundit.

Pjesëmarrja e lartë gjatë gjithë ditës ka çuar në një mobilizim të fortë të qytetarëve, me shumë prej tyre që zgjedhin të votojnë edhe në minutat e fundit. 

Sipas mediave, pjesëmarrja e regjistruar në orën 17:00 është më e larta e regjistruar ndonjëherë në vend. 

Pjesëmarrja në zgjedhjet parlamentare në Hungari vijon të rritet me ritme të larta, ndërsa deri në orën 17:00 ka arritur në 74.23%.

Sipas të dhënave të fundit, në votime kanë marrë pjesë 5,587,935 qytetarë nga gjithsej 7,527,742 me të drejtë vote.

Kjo përfaqëson një rritje të ndjeshme prej +11.31% krahasuar me zgjedhjet e vitit 2022 në të njëjtën orë, duke konfirmuar një nga pjesëmarrjet më të larta të viteve të fundit.

Ritmi i lartë i votimit gjatë gjithë ditës po e çon procesin drejt një rekordi historik, ndërsa pritet që pjesëmarrja të rritet edhe më tej deri në mbylljen e qendrave të votimit.

Lideri i opozitës hungareze Péter Magyar e ka cilësuar ditën e votimit si “festë të një referendumi për ndryshim regjimi”.

Në një postim në Facebook, ai tha se mbështetësit e tij po presin mbylljen e votimit “me qetësi, besim dhe siguri”, duke shtuar se pjesëmarrja gjatë ditës konfirmon pritshmëritë e tyre.

“Sot është festa e referendumit për ndryshim regjimi, që do të hyjë në librat e historisë hungareze,” shkroi ai.

Mediat pranë kryeministrit Viktor Orban po publikojnë skenarë alarmues, duke paralajmëruar se në rast të një konfirmimi të tij në pushtet, mund të ketë edhe një përpjekje për grusht shteti për të përmbysur rezultatin.

Por Magyar i hodhi poshtë ato duke i cilësuar si “gënjeshtra dhe propagandë” nga partia në pushtet.

Sipas tij, akuzat për protesta të dhunshme apo pushtime institucionesh janë pallavra të pabazuara dhe, siç u shpreh ai, “vijnë nga mendësia e këshilltarëve rusë”.

Qendra 'Demokracia', një organizatë e afërt me partinë në pushtet në Hungari ka akuzuar opozitën për blerje votash gjatë zgjedhjeve.

Sipas kësaj organizate, që mbështet partinë e kryeministrit Viktor Orban, ekziston një audio që pretendon se njerëz të lidhur me partinë opozitare Tisza kanë organizuar blerje votash në disa zona të vendit.

Ata thonë gjithashtu se kanë marrë denoncime për raste ku votuesve u janë ofruar para për të votuar për opozitën, si dhe për transport të organizuar të votuesve drejt qendrave të votimit.

Në një tjetër rast, pretendohet se në një zonë janë shpërndarë edhe ushqime për të ndikuar votën e qytetarëve.

Akuzat nuk janë verifikuar në mënyrë të pavarur nga mediat vendase.

Ndërsa Hungaria i afrohet mbylljes së votimeve, përballë Parlamentit në Budapest ka nisur muzika tekno.

Në sheshin Kossuth Lajos  Qindra të rinj dhe pjesëmarrës janë mbledhur në shesh për një aktivitet që është njëkohësisht festë techno, protestë simbolike dhe pritje e rezultateve zgjedhore.

I promovuar si një “afterparty” i zgjedhjeve, eventi “Më shumë techno në Parlament” pritet të zhvendoset më pas në Qendrën Kulturore Turbina, ku festa do të vijojë gjatë mbrëmjes.

Bashkimi Europian po përgatitet për çdo skenar pas zgjedhjeve në Hungari, nga një përplasje e vazhdueshme me Viktor Orban deri te një rifillim i kujdesshëm i marrëdhënieve në rast të fitores së Péter Magyar.

Zyrtarët në Bruksel presin që, nëse Orban qëndron në pushtet, tensionet me BE-në të thellohen, duke pasur parasysh përdorimin e shpeshtë të vetos për të bllokuar vendime të rëndësishme, përfshirë edhe paketën prej 90 miliardë eurosh për Ukrainën.

Sipas diplomatëve, një fitore e tij mund të sjellë edhe një radikalizim të mëtejshëm të qëndrimeve, ndërsa një fitore e ngushtë mund ta dobësojë politikisht dhe të sjellë një qasje më të moderuar në raport me BE-në.

Në të kundërt, një fitore e Peter Magyar shihet në Bruksel me optimizëm të kujdesshëm. Ai ka premtuar të përmirësojë marrëdhëniet me BE-në dhe të ulë tensionet, por zyrtarët evropianë nuk presin një ndryshim të menjëhershëm, pasi edhe ai ka qëndrime të rezervuara për çështje si migracioni dhe anëtarësimi i Ukrainës.

Një nga çështjet më të rëndësishme për çdo qeveri të re do të jetë zhbllokimi i fondeve evropiane. Aktualisht, rreth 17 miliardë euro mbeten të ngrira për shkak të shqetësimeve për sundimin e ligjit dhe korrupsionin, ndërsa Hungaria rrezikon të humbasë deri në 10 miliardë euro në muajt e ardhshëm nëse nuk ndërmerren hapa konkretë.

Analistët në Budapest po e cilësojnë pjesëmarrjen në zgjedhjet parlamentare si “të jashtëzakonshme”, duke theksuar se ritmi i votimit po tejkalon çdo parashikim.

Sipas analistit Mátyás Bódi, deri në mesditë pjesëmarrja kishte arritur në 54%, me 4,075,272 votues, një nivel që e vendos procesin në të njëjtin pikë me fundin e zgjedhjeve të vitit 2014. “Është tronditëse, absolutisht e jashtëzakonshme,” u shpreh ai.

Rritja ka qenë e ndjeshme krahasuar me orët e mëparshme: në orën 11:00 pjesëmarrja ishte 37.98%, ndërsa tashmë ka kaluar ndjeshëm këtë nivel duke arrirë në mbi 66% në orëm 15:00

Sipas Bódit, mobilizimi më i madh po vjen nga qytetet e mëdha dhe nga Budapesti. “Budapesti është zgjuar,” tha ai, duke theksuar rritjen e fortë të votuesve në kryeqytet gjatë orëve të para të ditës.

Edhe pse pjesëmarrja është në rritje në të gjitha zonat, diferenca mbetet e dukshme: në qytetet me mbi 20 mijë banorë rritja është më e fortë, ndërsa në vendbanimet e vogla — veçanërisht ato me më pak se 1,000 banorë — mobilizimi mbetet dukshëm më i ulët.

Kjo prirje konsiderohet domethënëse, pasi tradicionalisht zonat e vogla kanë qenë bastione të forta të partisë në pushtet. Sipas analistit, fakti që pjesëmarrja aty po rritet më pak mund të jetë një sinjal për balancat elektorale.

Bódi parashikon se pjesëmarrja në fund të ditës mund të arrijë mes 75% dhe 85%, me një nivel mbi 80% që po bëhet gjithnjë e më i mundshëm.

Pjesëmarrja në zgjedhjet në Hungari ka thyer rekordet, me mbi 66% të votuesve që kanë votuar deri në orën 15:00, ndërsa nga terreni mediat lokale raportojnë për probleme dhe incidente gjatë procesit.

Sipas të dhënave zyrtare, pjesëmarrja ka arritur në 66.01%, që përfaqëson një nivel historik për këtë fazë të ditës, me afro pesë milionë qytetarë që kanë hedhur votën. Pjesëmarrja është veçanërisht e lartë në qytete, ku mobilizimi i votuesve ka qenë më i madh.

Në nivel rajonal, shifrat tregojnë diferenca të dukshme mes qarqeve. Rekordin e mban qarku Pest me 69.67% dhe mbi 731 mijë votues, i ndjekur nga Győr-Moson-Sopron me 68.38% dhe Veszprém me 67.63%. Nivele të larta janë regjistruar edhe në qarqet Fejér (67.59%) dhe Vas (67.17%).

Ndërkohë, pjesëmarrja më e ulët është shënuar në qarqet Borsod-Abaúj-Zemplén me 60.08% dhe Szabolcs-Szatmár-Bereg me 60.33%, megjithëse edhe këto mbeten shifra të larta në krahasim me zgjedhjet e mëparshme.

Procesi zgjedhor është shoqëruar edhe me raportime për parregullsi në disa zona të vendit. Sipas Koalicionit për Votim të Pastër, janë evidentuar raste të transportit të organizuar të votuesve dhe shoqërimit të tyre drejt qendrave të votimit.

Në Dunaújváros, votuesit kanë marrë fletë votimi ku nuk ishte hequr emri i një kandidati të tërhequr, ndërsa në zona si Hajdúhadház dhe Hajdúsámson janë raportuar raste të shoqërimit të votuesve, përfshirë edhe të moshuar.

Raportime të tjera flasin për automjete që lëvizin gjatë gjithë ditës për të transportuar votues, si dhe për të shpërndarë pako të ndryshme për votuesit në qytete si Miskolc dhe Kazincbarcika. Në këtë të fundit është fotografuar edhe një kandidat i Fidesz duke i dhënë një pako një votuesi.

Shpërndarja e pjesëmarrjes deri në orën 15:00 sipas qarqeve: