Në emër të atij që e quajti grup koordinues të protestës Dritan Goxhaj, një emër i njohur për angazhimin e tij krah UCK-së gjatë luftës në Kosovë, lexoi disa kërkesa që siç tha reflektojnë propozimet e sovranit.

Pika e parë mbetet dorëheqja e panegociueshme e kryeministrit dhe qeverisë. Ndërsa pikë e dytë ishte krijimi i një qeverie teknike dhe tranzitore, jo partiake me mandate 12 mujor. Një kërkesë kjo që është në kundërshtim të hapur me kushtetutën e vendit. Një dorëheqje e qeverisë çon automatikisht në shpërndarjen e parlamentit, dhe në një rast të tillë, zgjedhjet e reja mbahen jo më vonë se 45 ditë pas shpërndarjes së tij.

Kërkesa e tretë ka të bëjë me një sërë ndryshimesh kushtetuese, që duhet të realizohet me referendum, duke përfshirë:

"Sot jam autorizuar nga grupi koordinues i protestës. Në emër të Grupit Koordinues të Protestës, duke dëgjuar propozimet e sovranit për 22 ditë me radhë, po dalim sot para jush me këtë deklaratë politike për të sqaruar protestuesit, si dhe të gjithë bashkëkombasit tanë, qoftë ata të pranishëm fizikisht në shesh, qoftë ata që na mbështesin me zemër dhe mendje, se kjo protestë mbarëpopullore dhe paqësore kërkon sa më poshtë:

1. Dorëheqjen e panegociueshme të kryeministrit dhe qeverisë.

2. Krijimin e një qeverie teknike dhe tranzitore, jopartiake dhe me mandat 12-mujor.

3. Ndryshime kushtetuese ku të gjithë shtetasit shqiptarë të jenë të barabartë përpara ligjit dhe miratimin me referendum popullor, duke përfshirë:

* ndryshimin e Kodit Zgjedhor;

* ndryshimin e ligjit për financimin e partive politike dhe organizatave të ndryshme;

* kufizimin e ushtrimit të detyrës së kryeministrit në jo më shumë se 2 mandate të plota ose të pjesshme gjatë gjithë jetës së një individi.

Nuk heqim dorë nga kërkesat fillestare:

* Anulimin e ndryshimeve të bëra për zonat e mbrojtura.

* Anulimin e ndryshimeve të bëra në ligjin për trashëgiminë kulturore.

* Shfuqizimin e paketës ligjore të njohur si “Pakti i Maleve”.

* Shfuqizimin e statusit dhe kuadrit ligjor për investimet strategjike.

* Një kontratë e re sociale mes qytetarëve dhe shtetit, që do të përpilohet pas konsultimit me intelektualë, ekspertë teknikë dhe qytetarë apartiakë të propozuar nga sheshi i protestës. Këto janë kërkesat tona, legjitime dhe të panegociueshme. Mbetemi të vendosur në rrugën e protestës paqësore deri në realizimin e tyre”, janë kërkesat.

Goxhaj tha se një kontratë të re sociale mes qytetarëve dhe shtetit, do të përpilohet pas konsultimeve me intelektualë, ekspertë teknikë dhe qytetarë apartiakë të propozuar nga sheshi i protestës.

Nga kërkesat u zhduk plotësisht figura e Sali Berishës dhe akuzat që turma deri më sot i ka drejtuar edhe kundër tij. Mbetet për t’u sqaruar kë përfaqëson realisht Goxhaj, pasi deri më sot nuk janë shpallur zyrtarisht emrat e grupit të organizatorëve.

Nuk vonoi as reagimi i kryeministrit Edi Rama, i cili akuzoi Goxhajn si përfaqësues të Iranit për shkak të deklaratave që vetë Goxhaj ka publikuar në profilin e tij ku i del në mbrojtje regjimit iranian.

"Si thoshin derrat e knaqun migjenianë të segmentit “intelektual” të protestës, nuk ka lidhje Irani ëëë…. Mos harroni çfarë ju kam thënë qysh në fillim: Dy fitimtarë do dalin kur kësaj proteste t’i bien të tëra puplat fallco të flamingove, Partia Socialiste që do të bëhet më e fortë dhe qeverisja jonë që do të përmirësohet shumë ndjeshëm”, shkruan ndër të tjera Rama në postimin e tij.

Një prej nismëtareve që prej fillimit, banorja e Rrjollit Luciana Kokaj tha se misioni i të gjithë protestueve është pastrimi i vendit nga klasa politike aktuale.

Rendit zhvillimet sipas orarit:
Ora 23:03
Pas marshimit nëpër Tiranë, qytetarët rikthehen përsëri te kryeministria! Paralajmërojnë të kalojnë natën në bulevard

 

Pas marshimit nga kryeministria, bashkia e Tiranës, zona e 9-katësheve, në Bllok për të vijuar më pas te universiteti i Politeknikut, protestuesit janë rikthyer përsëri te bulevardi ‘Dëshmorët e Kombit’.

Përveç protestës e marshimit, qytetarët kanë kaluar dhe natën poshtë zyrës së Ramës 2 netë të kaluara, ndërsa të njëjtin skenar kanë paralajmëruar dhe për mbrëmjen e sotme.

K.B/Shqiptarja.com

Ora 22:04
Ish-luftëtari i UÇK-së lexoi kërkesat e protestuesve, Rama: Deklaratë e koordinuar, lidhje me Iranin! PS do dalë fituar kur t’i bien puplat kësaj flamingoje fallco (VIDEO)

Kryeministri Edi Rama ka postuar momentin kur ish-luftëtari i UÇK-së Dritan Goxhaj ka lexuar nga protesta në bulevardi ‘Dëshmorët e Kombit’ kërkesat e qytetarëve shqiptarë drejtuar qeverisë së tij.

Zgjedhjen e Goxhajt për të lexuar kërkesat e qytetarëve, Rama e lidh me ndikimin e Iranit dhe përdorimin që po i bën kësaj proteste kundër shtetit shqiptar, për shkak të deklaratave që vetë Goxhaj ka publikuar në profilin e tij ku i del në mbrojtje regjimit iranian.

“Si thoshin derrat e knaqun migjenianë të segmentit “intelektual” të protestës, nuk ka lidhje Irani ëëë….

Mos harroni çfarë ju kam thënë qysh në fillim: Dy fitimtarë do dalin kur kësaj proteste t’i bien të tëra puplat fallco të flamingove, Partia Socialiste që do të bëhet më e fortë dhe qeverisja jonë që do të përmirësohet shumë ndjeshëm”, shkruan Rama në postimin e tij.

K.B/Shqiptarja.com

Ora 21:15
Protestuesi nga tubimi para Kryeministrisë: Gardhet anembanë Shqipërisë po bien! Qeveria do zerojë taksat për oligarkët, që të ndërtojnë në zona preferenciale

 

Një qytetar ka deklaruar gjatë fjalës së tij në protestën e zhvilluar para Kryeministrisë se gardhet po bien anembanë Shqipërisë. Sipas tij, i vetmi gardh që do të vijojë të mbetet, është gardhi që qytetarët i kanë bërë kryeministrit Edi Rama, deri në largimin e këtij të fundit nga pushteti.

Qytetari tha gjithashtu se teksa po protestohet për 23 ditë me radhë, qeveria ka nxjerrë për konsultim publik projektligjin për taksimin e pasurive të paluajtshme.

Ai shtoi se përmes këtij projektligji, qeveria do të rrisë taksat për qytetarët e thjeshtë dhe do të zerojë taksat për oligarkët që sipas tij do të ndërtojnë në zona preferenciale.

“Teksa ne protestojmë për 23 ditë me radhë, qeveria ka nxjerrë për konsultim publik projektligjin për taksimin e pasurive të paluajtshme. Do të rrisë taksat për ne që të mbushë buxhetet e bashkive që kanë vjedhur dhe janë në SPAK dhe do të zerojë taksat për oligarkët që do të ndërtojnë në zona preferenciale. Por gardhet po bien anëmbanë Shqipërisë, nga Zvërneci, në Rrjoll e në Kakome. I vetmi gardh që nuk do të bjerë është gardhi që ne do i bëjmë këtu këtij, derisa ky të ikë në shtëpi”, tha mes të tjerash një protestues.

R.Xh/Shqiptarja.com

Ora 21:03
I riu nga protesta: Pse duhet të paguajnë ne çmimin e problemeve që nuk i kemi krijuar? Kërkojmë institucione që mbajnë përgjegjësi

 

Një student mori fjalën nga podiumi i protestës, i cili kërkoi të drejtën për tu arsimuar, një sistem të ri që nuk funksionon kundër të rinjve, por pro tyre.

“Jam këtu si një nga mijëra të rinj që duan të ndërtojnë një të ardhme në një sistem që duket sikur punon kundër nesh. Na thuhet të studiojmë, të punojmë fort, se merita do të shpërblehet, por përditshmëria jonë tregon diçka tjetër. Shumë prej nesh paguajnë materiale nga xhepi, përballen me mungesë mundësish dhe institucione që flasin për ne, por kurrë nuk na dëgjojnë.

Pse duhet të paguajnë të rinjtë çmimin e problemeve që nuk i kanë krijuar? Pse duhet të jetojmë me frikën se e ardhmja mund të bllokohet larg nesh? Pse duhet të luftojmë për gjëra që duhet të ishin normale: transparencë, meritë dhe dinjitet?

Ne nuk kërkojmë privilegje, kërkojmë institucione që mbajnë përgjegjësi. Kërkojmë që zëri ynë të dëgjohet, sepse arsimi nuk është favor, është e drejtë. Poshtë sistemi, poshtë Rama”, tha i riu.

K.B/Shqiptarja.com

Ora 20:53
Aktivistja Kokaj nga protesta: Kërkojmë kontratë të re sociale të qytetarëve me shtetin! Në shesh jemi për pastrimin e shtëpisë sonë, jo për SHBA, Izraelin dhe Palestinën

 

Aktivistja Luçiana Kokaj, e cila është edhe një prej nismëtareve të protestave që po zhvillohen në Tiranë, gjatë fjalës së saj në tubim është shprehur se protestuesit do të kërkojnë një kontratë të re sociale me shtetin.

Kokaj tha se Kushtetuta e Republikës së Shqipërisë i njeh referendumet, por sipas saj, pushtetarët në vendin tonë kanë ndryshuar ligjet, në mënyrë që zëri i qytetarëve të mos dëgjohet. Këtë gjë, Kokaj tha se do të ndryshojnë përmes protestave.

Ajo tha gjithashtu se mes protestuesve nuk ka ndarje fetare, politike apo krahinore. Sipas Kokajt, misioni i të gjithë protestueve është ‘pastrimi i shtëpisë së tyre’ nga klasa politike aktuale.

“Kërkesat janë shumë të qarta. E para është dorëheqja e kryeministrit. Ne nuk jemi këtu për të bërë parti politike, por për t’i dhënë një faqe të re Shqipërisë. Dhe jemi këtu për të kërkuar një kontratë të re sociale të qytetarëve me shtetin. Ku mos të jenë më vetëm 140 deputetë që do vendosin për fatet tona, ku mos të jenë më vetëm 2 persona që emërojnë deputetë me lista të mbyllura për të vendosur për fatet tona, por të kemi ne të drejtën për të vendosur për fatet tona. Sesi kjo do zgjidhet, absolutisht që do jenë edhe ekspertët që do japin mendimin e tyre dhe që do konkludojë në kërkesa të sakta. Patjetër që Kushtetuta e njeh referendumin, por këta për të mos na lejuar ne që të kemi zë të fortë, i kanë ndryshuar ligjet. Dhe ne këtë do e ndryshojmë nga ky shesh. Çdo orientim që do marrë protesta, do jeni ju ata që do vendosni. Zëri juaj do dëgjohet deri në fund dhe nuk do të mund askush të negociojë mbi emrin tuaj. Kjo protestë është përtej bindjeve fetare, politike e ndasive krahinore. Ne jemi këtu për Shqipërinë. Ju bëj thirrje të gjithë atyre që kanë dëgjuar një deklaratë të pasaktë, që ne nuk kemi asnjë ndarje fetare. Ne s’jemi këtu për Palestinë, Izrael, Amerikë, por për të pastruar shtëpinë tonë”, tha aktivistja Luçiana Kokaj.

R.Xh/Shqiptarja.com

Ora 20:33
Ish-deputeti i PD Ervin Salianji i bashkohet protestës së qytetarëve te kryeministria

 

Ish-deputeti i Partisë Demokratike, Ervin Salianji i është bashkuar protestës së qytetarëve në ditën e 23. Në protestë kanë shkuar edhe deputetë të PD, Jorida Tabaku e të tjerë.

Salianji kandidoi gjithashtu dhe për kryetar të PD, por Sali Berisha e përjashtoi nga gara me argumentin se nuk ishte pjesë e strukturave. Qytetarët në protestë kërkojnë largimin e dyshes Rama-Berisha, si dy figura që kanë dominuar skenën politike për më shumë se 35 vite.

K.B/Shqiptarja.com

Ora 20:05
Sindikatat e pavarurave të Shqipërisë lajmërojnë nesër protestë te ministria e Financave, Ilir Xhemalaj: S’ka ekonomi të fortë e qytetarë të varfër

 

Ilir Xhemalaj, përfaqësues i sindikatave të pavarura të Shqipërisë lajmëroi ditën e nesërme protestë në orën 10:00 përpara ministrisë së Ekonomisë e Financave, duke i bërë thirrje qytetarëve për t’iu bashkuar.

“Sot kam një thirrje për çdo punëtor, pensionist, çdo të ri e qytetar të ndershëm. Në sindikatat shqiptare, nuk e kam për ato që janë lëpirë me shtetin për 36 vjet, e kam për sindikatat e reja të cilat nesër do të mblidhen përpara Ministrisë së Financave për të protestuar. Ju ftoj të jeni me ne.

Nesër proteston Shqipëria që punon, punëtori që zgjohet para lindjes së diellit dhe mezi e mbyll muajin. Pensionisti që pas një jete pune, numëron ato qindarkat përpara farmacisë për të blerë ilaçet. Proteston i riu që punon, por nuk arrin të blejë një shtëpi për familjen e nuk ndërton dot një familje.

Kur punëtori varfërohet nga puna e tij, ka diçka që nuk shkon. Nuk ka ekonomi të fortë dhe qytetarë të varfër. Nuk kërkojmë privilegje, vetëm dinjitet që të punojmë në vendin tonë dhe të rrisim fëmijët në vendin tonë.

Një vend nuk mbahet në këmbë nga lëmosha që këta pushtetarë i japin çdo punëtori. Një vend mbahet në këmbë nga punëtorët. Prandaj sot ftoj qytetarët që të bashkohen me protestën e sindikatave në orën 10:00. Askush nuk del për karrige e politikë, vetëm për dinjitetin tonë”, tha Ilir Xhemalaj.

K.B/Shqiptarja.com

Ora 19:54
Organizatorët e protestave shpalosin listën me kërkesat drejtuar Ramës, dorëheqje, kufizim të mandatit të kryeministrit e qeveri teknike

 

Grupi organizator i protestës ka dalë me listën e kërkesave të plota drejtuar qeverisë me në krye kryeministrit Edi Rama, që u lexua nga ish-luftëtari i UÇK-së Dritan Goxhaj.

“Sot jam autorizuar nga grupi koordinues i protestës. Në emër të grupit koordinues, duke dëgjuar propozimet e sovranit, dalim sot para jush me këtë deklaratë për të sqaruar protestuesit dhe gjithë bashkëkombasit se kjo protestë kërkon:

1. Dorëheqjen e panegociueshme të kryeministrit dhe qeverisë.

2. Krijimin e një qeverie teknike dhe tranzitore, jopartiake dhe me mandat 12-mujor.

3. Ndryshime kushtetuese ku të gjithë shtetasit shqiptarë të jenë të barabartë përpara ligjit dhe miratimin me referendum popullor, duke përfshirë:

* ndryshimin e Kodit Zgjedhor;

* ndryshimin e ligjit për financimin e partive politike dhe organizatave të ndryshme;

* kufizimin e ushtrimit të detyrës së kryeministrit në jo më shumë se 2 mandate të plota ose të pjesshme gjatë gjithë jetës së një individi.

Nuk heqim dorë nga kërkesat fillestare:

* Anulimin e ndryshimeve të bëra për zonat e mbrojtura.

* Anulimin e ndryshimeve të bëra në ligjin për trashëgiminë kulturore.

* Shfuqizimin e paketës ligjore të njohur si “Pakti i Maleve”.

* Shfuqizimin e statusit dhe kuadrit ligjor për investimet strategjike.

* Një kontratë e re sociale mes qytetarëve dhe shtetit, që do të përpilohet pas konsultimit me intelektualë, ekspertë teknikë dhe qytetarë apartiakë të propozuar nga sheshi i protestës.

Këto janë kërkesat tona, legjitime dhe të panegociueshme. Mbetemi të vendosur në rrugën e protestës paqësore deri në realizimin e tyre”, janë kërkesat.

K.B/Shqiptarja.com