Protesta kombëtare kthehet në ‘paradë’ simbolesh! Tortë betoni për Ramën, arkivol 'politik' e uniformë e burgu! Diaspora kërkon zgjedhje të lira, ‘Kryendrituri’: Kuvendi do dalë nga sheshi

Protestuesit vijojnë me marshimin në rrugët e Tiranës dhe momentalisht janë te “Zogu i Zi.” Më pas itinerari vazhdon drejt “Rrugës së Durrësit”, për t’u mbyllur te sheshi ‘Skënderbej.’

Marshimi ka qenë kryesisht i qetë dhe i mbizotëruar nga thirrja “Lironi çunat!”

Pasi mikrofoni u dorëzua dhe u bë thirrje se “sheshi tanimë është i lirë” pasi për shkak të numrit të pjesëmarrësve në protestë, askush s’mund të mbajë përgjegjësi për marshimin, vijoi tubimi nëpër rrugët e Tiranës.

Vetëm pak minuta më vonë, u ndezën edhe flakadanë.

Një protestues vlonjat përdori një gjuhë të papërshtatshme gjatë protestës, pavarësisht se në sheshin para kryeministrisë ndodheshin të pranishëm gra e fëmijë.

“Edi Rama, hiq dorë nga Vlora se do të t’i q** robt!”, tha ai teksa shpërthyen reagimet.

Parada e flamingove është rishfaqur në protestën para kryeministrisë. Siç ka ndodhur shpeshherë, flamingot ‘më të vogla’ ndjekin një flamingo ‘mëmë’ që u prin rrugën teksa kalojnë mes protestuesve.

Aktivisti Edison Lika pati një thirrje për ministrin Besfort Lamallari, pas deklaratave të tij për avokatin e protestuesve, Gentian Sejranin. Lika i tha ministrit të Brendshëm se “i erdhi fundi” dhe e pret burgu.

“Ministri i Brendshëm Besfort Lamallari që shtrëngonte kollaren kur e emëroi Rama, sot pati guximin të merret me avokatët. I themi edhe Besfortit, të erdhi fundi! Atë kostumin me kollare do të ta zëvendësojmë me rrobat e burgut!”, tha Lika.

Një protestues kishte sjellë disa dhurata në shesh për datëlindjen e kryeministrit Edi Rama. Duke nisur nga një uniformë burgu për të cilën me ironi tha se “në behar të mban freskët, në dimër shumë ngrohtë”, të një brisk, miell apo sapun që i sugjeroi ta ndajë me Erion Veliajn.

“Ne studentët në protestë i kemi sjellë dhuratë Ramën, meqë këto 13 vite nuk ka marrë asnjë dhuratë. Ky është kostum burgu nga më të mirët që ka Europa. Në behar të mban freskët, në dimër shumë ngrohtë. Mos u mërzit se kemi menduar për shumë gjëra të tjera. Një sapun, por do të duhet ta ndash bashkë me Erion Veliajn. Të kam sjellë edhe një qese me miell, sepse e di që do të marrë malli të gatuash ndonjë byrek. E ke miell bo direkt nga fshatrat e Korçës. I kam sjellë një brisk. A e sheh ca populli jemi. Ta mbash gëzuar e mos të dalësh kurrë nga burgu. Shumë burgime për ty, shumë burgime për Ramën, shumë burgime për ty”, tha protestuesi.

Edviol Kulluri, ideatori i platformës për Kuvendin Kombëtar me 150 anëtarë, tha para protestuesve se çdo gjë do të dalë vetëm nga sheshi para kryeministrisë. Ai tha se Rama i ka shpifur veprat penale për të (kryeministri publikoi një postim ku rendiste 8 procedime penale në 8 vjet), gjë për të cilën do të ngrejë padi.

“Unë jam ai krimineli që më nxori Rama dhe ministrat e tij duke shpifur vepra penale që gjoja kisha bërë. Do t’i ngre një padi. Siç më sulmuan mua, sot janë në burg djemtë tanë. Lironi çunat! Të gjithë nesër para gjykatës që t’i nxjerrim djemtë tanë! Na ka sjellë thirrja e zemrës dhe kjo zemër thotë që duhet ta mbajmë zemrën të bashkuar dhe të fortë! Ky establishment më ka akuzuar se po ngre struktura paralele për Kuvendin Kombëtar. Çdo gjë do të dalë nga sheshi! Vullneti i protestës para çdo gjëje! Rama në burg, Berisha në burg!”, tha Kulluri.

Një protestues tha gjatë fjalimit në protestë se kanë informacione se njerëz nga rrethet janë nisur për t’iu bashkuar tubimeve, por sipas tij në një mënyrë tjetër, duke nënkuptuar akte dhune. Ai tha se Këshilli Organizativ i protestës distancohet nga çdo akt dhune.

“Ne si atdhetarë kërkojmë rrëzimin e qeverisë dhe sistemit 35-vjecar në paqe. Kemi informacione se njerëz nga rrethe janë nis të vijnë të veprojnë ndryshe. Ne si këshill organizativ nuk pajtohemi me asnjë shenjë dhune. Kushdo që të vijë dhe të provojë një mënyrë ndryshe, ne jemi të distancuar prej veprave te dhunës kundër institucioneve dhe policisë. Rama duhet të japë dorëheqjen në formë paqësore”, tha ai.

Një tjetër simbolikë erdhi në protestën para kryeministrisë. Studentët sollën një statujë të ideuar për të përfaqësuar kryeministrin Rama, e cila është me syze të kuqe. Në qafë i kishin varur një fletë ku shkruhej “Diktatori i fundit.”

Duke kujtuar rrëzimin e bustit të Enver Hoxhës më 20 shkurt 1991, ata rrëzuan edhe këtë statujë, duke e ndarë më dysh dhe shkelmuar, si 'surprizë' për 62-vjetorin.

Protestuesit janë kujdesur që jo vetëm torta, por as festa mos të mungojë para kryeministrisë. Disa prej tyre janë lidhur dorë për dore dhe hedhin valle, ndërsa ritmin ua mbajnë tupanat.

Një prej tyre nuk i është ndarë as zakonit, pasi në kokë ka vënë jo një gotë, por një shishe uji.

Një vogëlush u ngjit në podium për t’i kënduar kryeministrit Rama këngën e ditëlindjes, por në një formë tjetër.

“Shumë urime për ty,

asnjëri s’të do ty,

ti dukesh si kafshë,

shko mbrapa te Kopshti Zoologjik!”

Një ‘soprano’ i dedikoi një këngë kryeministrit Edi Rama për datëlindje. Duke e quajtur armik të Shqipërisë, ajo këndoi “Edi Rama, SPAK ju”.

Protestuesit kanë sjellë një tjetër tortë te kryeministria, kësaj here prej vërteti dhe jo betoni. Në tortë mbishkruhet “Rama TQR” dhe më pas “Te Quiero Rama.” Ata ndezën edhe një qiri me numrin 0, të cilin e frynë pasi kënduan refrenin “Rama jepe dorëheqjen.”

Pas tortës prej betoni me të cilën i uruan ditëlindjen Ramës, protestuesit kanë sjellë një arkivol para kryeministrisë. Arkivolit i prin një pankartë ku shkruhet “Arkivoli politik i Ramës”, shkrim që është vendosur edhe në anë të tij.

Bashkëshortja e Altin Hilës, protestuesit të arrestuar për të cilin është raportuar në rrjetet sociale se ka një fëmijë të sëmurë, gjë që më pas solli edhe mbledhjen e një shume të konsiderueshme parash, uroi që të gjithë të arrestuarit të lirohen sa më shpejt.

“Shumë faleminderit për kontributin që keni dhënë për familjen tonë! Ju falënderoj nga zemra! Jam bashkuar me ju në protestë për bashkëshortin tim Altin Hila që të lirohet sa më shpejt, bashkë me gjithë ata që janë të burgosur sepse nuk e meritojnë të rrinë në burg! E meriton dikush tjetër, jo bijtë e nënave që kanë halle dhe dalin në protestë për të drejtat e tyre! Nuk e meritojnë çunat tanë të rrinë në burg, e meritoni ju!”, tha Hila.

Një emigrant shqiptar i kërkoi Edi Ramës dorëheqjen dhe parashtroi 4 kërkesa.

“Shqiptarët e diasporës dhe ata brenda kufirit të kanë vënë një kusht dorëhiqu. Hapi rrugë procesit demokratike, ti japim fund tranzicionit. Kërkesat tona ti përsëris, dorëheqje pa kushte dhe ti hapësh rrugë qeverisë tranzitore apolitike dhe procese demokratike të mirëfillta. Kjo qeveri teknike duhet të mandatohet që të garantojë ndryshim të kodit elektoral, të hyjmë në zgjedhje me lista të hapura. Të kemi zgjedhje që te numërohen ne mënyrë elektronikë si vëllezërit tanë në Kosovë që mos të kemi deformim te rezultatit”, tha një emigrant.

Analisti Shpend Gashi u bëri thirrje protestuesve të mos bien pre e provokimeve.

“Fuqia jonë më e madhe është dashuria. Mos bini pre e asnjë provokimi sepse gjithë kjo gjë e madhe është investimi i gjithë jetës sonë. E kemi vendosur jetën kolateral. Kërkesa ime është ju lutem largoni çdo lloj provokimi, lironi çunat!”, tha Gashi.

Për kryeministrin Rama, që sot feston ditëlindjen, protestuesit ‘kanë përgatitur’ një tortë prej betoni. Simbolika lidhet me investimin në Zvërnec pasi tortës i kanë vendosur edhe disa flamingo. Ndërsa në majë të tortës shkruhet “Shumë burg për ty!”

“Edhe 100 vite në burg!”, është ‘urimi’ i tyre. Torta ndiqet edhe nga një paradë flamingosh.

Një emigrante nga Kanadaja që mori fjalën në protestën para kryeministrisë, tha se jeton atje prej 23 vitesh. Ndërsa nisi të rrëfente historinë e saj, Bora Mitrovica tha se emrin ia vuri Sali Berisha, kumbari i saj që “notonte në paratë e shqiptarëve.” Më pas, u kërkoi protestuesve të luanin lojën e njohur të kukafshehthit me të, por me një version të ri.

“Në maj 2023 prindërit e mi eredhën te gjyshërit dhe më thanë se do të më çonin për pushime në Toronto. 23 vite pushime duke qarë dëshpërimisht për nënën e gjyshin se doja të flija në dyshemenë e tyre. Unë mbaj gjakun e Ibrahim Mitrovicës. Çdo familje këtu ka histori, imja ka një emër! Emri im është Bora Mitrovica! Sali Berisha më vuri emrin e bukurive të Tropojës! O Salë, ti më mbajte kur isha fëmijë, por s’e vure re që kisha ikur! The se emrin do ta kisha Bora si bora e maleve, por u rrita jashtë. Kumbari im notonte me paratë e Shqipërisë! Nëna ime e bukur vdiq duke thirrur emrin tim! Ne u rritëm me përshesh me ujë, o Rama ç’po hanë fëmijët e tu? Ne jemi bijtë e Skënderbeut, jemi shqiponja! Ne kemi derdhur gjak për këtë vend! Rama, a do ta shisje nënën tënde? A më bëni një nder, do të luajmë një lojë të fundit? Hapa dollapa... Rama në burg, Berisha në burg!”, tha Bora Mitrovica.

Vajza e një protestuesi të arrestuar pas akteve të dhunës të Kuvendi, bëri thirrje për lirimin e protestuesve. Ajo pretendon se babai Frrok Bardhi dhe i vëllai Everest Bardhi, të dy në qeli, janë dhunuar nga policia. Ndonëse ishin protestuesit që të protesta te kuvendi hodhën gurë e sende të forta në drejtim të policisë.

“Jam krenare për ata të dy. Babai dhe vëllai im u dhunuan gjatë protestës dhe sot ndodhen ne komisariatin numër 3. Nuk jam këtu për të përhapur urrejtje, askush nuk duhet të dhunohet për shkak të bindjeve apo se merr pjesë në një protestë. Ju bëj thirrje të mos heshtim përballë padrejtësisë. Lironi çumat, lironi çunat”, tha Arbria Bardhi.

Protesta e 35-të para kryeministrisë ka nisur me leximin e një deklarate të grupit organizator, nga Dritan Goxhaj ku i urojnë Ditën e Pavarësisë SHBA-ve. Ndërsa shprehet rëndësia e kësaj dite dhe ndikimi që ajo ka në të gjithë botën, thuhet se shoqëritë demokratike kanë të drejtë të kërkojnë ndryshimin kur besimi i tyre cenohet nga pushteti.

“Sot, në Ditën e Pavarësisë së SHBA-ve, i urojmë popullit amerikan 250-vjetorin e Pavarësisë! SHBA është aleate strategjike e Shqipërisë dhe mike e popullit shqiptar që ka qëndruar pranë. Në këtë ditë, kujtojmë Deklaratën e Pavarësië. Ajo ishte shpallja e një parimi që vazhdon të frymëzojë popuj anembanë botës, se qeveritë e marrin legjitimitetin nga të qeverisurit. Deklarata e Pavarësisë na kujton se pushteti nuk është pronë e një qeverie, por besim i dhënë nga qytetarët. Kur ky besim cenohet, shoqëritë demokratike kanë të drejtë të kërkojnë ndryshimin me mjete demokratike. Gëzuar 250-vjetorin e Pavarësisë së SHBA-ve! Qoftë kjo ditë se liria nuk është dhuratë e pushtetit, por e drejtë e njerëzve”, lexoi Goxhaj.

Ndërsa protestuesit po marshonin drejt Kryeministrisë, ata kaluan edhe në Fan Zone, ku qytetarë të shumtë ishin ulur për të parë ndeshjet e Botërorit.

Të shumta janë thirrjet në drejtim te tyre. Disa u thonë “jeni sufllaqe”, të tjerë në kor thërrasin “turp” apo “bashkohuni me ne” në protestë.

Sapo kanë nisur marshimin nga sheshi ‘Skënderbej’ drejt kryeministrisë, protestuesit kanë shprehur pa vonesë revoltën e tyre kundër qeverisë. Te muri i Ministrisë së Brendshme, ata kanë ngjitur një parrullë ku shkruhet “Poshtë komunistët!”