Mjeku veteriner: Procesi i vaksinimit duhet të vijojë normalisht, kafshët e bimët të tejngopura me hormone

Mjeku veteriner Agim Nelaj lidhur me situatën e koronavirusit në vend, përsa i takon edhe sektorit të blegtorisë, gjatë një lidhje skype në emisionin ’Repolitix’ të gazetares Odeta Dume u shpreh se puna për sa i takon bërjes së vaksinave për kafshët duhet të vijojë normalisht. Kjo, për faktin se deri më tani nuk kemi rast tek ndonjë kafshë që të jetë konfirmuar pozitiv me COVID-19.

"Fakti është që nuk ka asnjë arsye që pandemia të pengojë punën veterinare. Sezoni pranveror është sezoni ku bëhen të gjitha masat profilaktike në blegtori dhe pastaj fillon koha e asimilimit tek kafshët dhe pastaj do të kalojë tek kullotat, por kështu po kalon gjithë kjo periudhë. Përderisa nuk ka asnjë rast kafshe të konfirmuar pozitiv me këtë virus nuk ka arsye pse të pezullohet’’, tha Nelaj.

Mjeku veterinar sqaron ndikimin që ka pasur në kohë prishja e ekuilibrit në marrëdhënien njeri-ekosistem. E njëjta gjë që ka ndodhur edhe me situatën e “Lopës së çmendur”, rastet e rrezikut kur virusi që mbart kafsha transmetohet tek njeriu, pasi ka konsumuar mishin dhe nënproduktet e tij.

"Kafshët tona apo ushqimet që marrim nga kafshët apo nga bimët tona janë të tejngopura me hormone apo me pesticide. Në vitet 90’ ndodhi që të kishte një gjë mjaft misterioze që u përhap në të gjithë botën, ishte një fenomen mjaft i çuditshëm që u 'çmend' lopa. Fakti është që njerëzit për të rritur sasinë e prodhimit të mishit, kishin marrë mishin e lopës dhe të gjitha kafshëve të tjera, i dërguan në industri, i bluan dhe i bënë miellra dhe filluan të ushqejnë një kafshë që është barngrënëse siç është lopa, me ushqime që janë për mishngrënësit. Në këtë mënyrë ndodhi zbutja e trurit, prandaj u quajt 'Lopa e çmendur'. Edhe njerëzit gjatë kësaj kohe janë ushqyer me këtë lloj mishi. Pas kësaj doli një sëmundje tjetër tek njerëzit e cila u vërtetua se ishte një lloj proteine që vinte nga këto kafshë të ushqyera me këtë lloj ushqimi. U përhap sëmundja edhe tek njerëzit. Mendoj që ky virus agresiv ka evoluar dhe imuniteti tek njerëzit ka rënë. Ky virus është i përhapur në ato zona ku ka një popullsi më të madhe", sqaroi mjeku veteriner.

TAG:
• repolitix
• Blegtoria
• Koronavirus
• koronavirusi ne shqiperi
• agim nelaj