Një vit pas arrestimit, GJKKO kalon për gjykim dosjen e Veliajt! Avokatët bojkot seancës: Shkelje të rënda të procesit ligjor

TIRANË- Një vit pas arrestimit me urdhër të SPAK, GJKKO ka vendosur të kalojë për gjykim dosjen në ngarkim të kryebashkiakut të Tiranës, Erion Veliaj, bashkëshortes së tij Ajola Xoxa, si edhe 28 personave e shoqërive pjesë e së njëjtës dosje. 

Në një kohë kur Erion Veliaj në të gjitha seancat e javës së fundit ka kërkuar mundësinë që të njihet me dosjen për të pasur një mbrojtje efektive, avokatët e tij por edhe të disa të pandehurve të tjerë e bojkotuan seancën e kësaj të hëne për shkak sipas tyre të shkeljeve të rënda të procesit të rregullt ligjor gjate seancave paraprake. Vetë kryebashkiaku Veliaj, bashkëshortja e tij Ajola Xoxa dhe shumë të akuzuar të tjerë nuk ishin të pranishëm në seancë,

“Për shkak të shkeljeve të rënda të procesit të rregullt ligjor gjatë seancave paraprake, avokatët e çështjes ku po gjykohen kryetari i Bashkisë së Tiranës dhe të pandehur të tjerë, kane bojkotuar seancën e sotme ku merret vendimi për të kaluar gjykimin në themel ose jo”, thuhet në reagimin e avokatëve të ndarë për mediat.

LEXO EDHE:
‘Basti’ i Prençit: Një nga gjyqtarët e Kushtetueses do të merret nën hetim nga SPAK

Dosja Veliaj kalon për gjykim, ndërsa vetë kryebashkiaku në të gjitha seancat ka pretenduar se i është mohuar e drejta për mbrojtje efektive, pasi ende nuk është njohur me dosjen hetimore. Një debat i tillë u zhvillua edhe në seancën e 2 shkurtit mes tij dhe gjyqtares Etleva Deda, pasi kryebashkiaku kërkoi shtyrjen e seancës, por gjyqtarja e cilësoi si të ezauruar fazën e mbrojtjes. Veliaj u largua nga salla dhe kërkoi përjashtimin e saj, kërkesë që u rrëzua më pas.

Kryebashkiaku i Tiranës ndodhet në arrest me burg që prej 10 shkurtit 2025, ndërsa SPAK e dërgoi kërkesën për ta kaluar dosjen për gjykim vetëm 5 muaj më parë.  SPAK ka renditur ndaj Veliajt 13 akuza, të tilla si korrupsion pasiv, pastrim parash, mosdeklarim pasurie, shpërdorim detyre dhe futja e sendeve në burg.

Shumica e akuzave është ajo e korrupsionit pasiv e kryer në 9 raste, në raport me disa kompani për të cilat SPAK thotë se ka marrë përfitime të parregullta në formën e shumave monetare dhe pasurive të paluajtshme, të cilët nga ana e tyre kanë marrë leje ndërtimi dhe përfituar fonde publike nga Bashkia Tiranë. Edhe bashkëshortja e tij, Ajola Xoxa, akuzohet nga SPAK për korrupsion pasiv në 9 raste në lidhje me subjekte tregtare dhe organizata jofitimprurëse, njëjtë si Erion Veliaj. Gjithashtu, Xoxa akuzohet edhe për pastrim parash, mosdeklarim pasurie dhe fshehje e të ardhurave.

Biznesmenët akuzohen për korrupsion aktiv të funksionarëve të lartë shtetëror ose të zgjedhurve vendorë, fshehje të ardhurash dhe pastrim parash. Ish-deputetja Klotilda Bushka akuzohet për veprime që pengojnë zbulimin e së vërtetës, kurse Fatjon Baci është gardiani i burgut të Durrësit, i cili i dha telefonin Erjon Veliaj gjatë transferimit të tij nga qelia në gjykatë, në dy raste dhe akuzohet për “Futja ose mbajtja e sendeve të ndaluara në institucionin e ekzekutimit të vendimeve me burgim”.

Ndërkohë pas zbardhjes së vendimit të plotë të Gjykatës së Posaçme, e cila miratoi kërkesën e SPAK dhe dërgoi për gjykim dosjen në ngarkim të kryebashkiakut Erion Veliaj, bashkëshortes së tij, Ajola Xoxa, si dhe 28 personave e shoqërive të ndryshme tregtare, ajo që vihet re, është se të pandehurit Elman Abule, Fatmir Bektashi, Ina Goxhaj, Frosina Bollo, Adela Kondakçiu, Klotilda Bushka, Flutur Xhani dhe Fatjon Baçi, si dhe përfaqësuesit e  kompanive “Rametal” sh.p.k dhe “Kontakt” sh.p.k, por edhe OJF “Frobolus”, është se kanë kërkuar gjykim të shkurtuar.

“Së bashku me kërkesën e Prokurorisë së Posaçme për dërgimin e çështjes në gjyq, dërgohet edhe kërkesa e të pandehurve Elman Abule, ‘Rametal’ sh.p.k., Fatmir Bektashi, ‘Kontakt’ sh.p.k., Ina Goxhaj, Frosina Bollo, OJF ‘Frobolus’, Adela Kondakçiu, Klotilda Bushka, Flutur Xhani dhe Fatjon Baçi, për aplikimin e gjykimit të posaçëm, atë të shkurtuar”, thuhet në njoftimin e GJKKO-së.

 

Lajmi në përditësim...