Spahiu në Report Tv: Berisha qesharak! Kur gjykata i jep vulën i quan të pavarura, kur e marrin të pandehur: ‘varen nga Rama’

Juristi Kreshnik Spahiu teksa ka komentuar marrjen të pandehur nga SPAK të Sali Berishës për aferën ‘Partizani’, tha me ironi se Berisha ku arrestohen socialistët thotë se ka prova, por për dosjet e tij, thotë se ka vetëm akuza ‘politike’. Në emisionin ‘Studio Live’ në Report Tv, Spahiu theksoi se Berisha vepron me dy standarde.

‘Pse sa herë që arrestohen të majtët Sali Berisha person deklaron se ka prova dhe kur ka akuza ndaj vetes thotë se janë akuza politike. Unë përsëri gjykoj mbi standardin dhe ky është një standard që askush nuk mund ta anashkalojë.

Për një telefon për një celular janë në arrest me burg. Vepra penale që ka bërë Safet Gjici duke kryer seks në zyrë, është më e rëndë se vepra penale që kryen Berisha? Nëse Safet Gjici është në burg për një marrëdhënie seksualë, Vangjush Dako për një kat shtesë apo Fredi Beleri për 50  mijë lek u hetuan në arrest me burg, pse Berisha dhe dhëndri hetohen në arrest me burg. Duhet të shohim nëse Berisha është i persekutuar apo i favorizuar.’- tha Spahiu, për gazetarin Arbër Hitaj.

Duke komentuar protestën e militantëve të Sali Berishës, jashtë dyerve të SPAK, juristi Kreshnik Spahiu, ngriti pyetjen sikur socialistët të protestonin për çdo ministër, deputet apo kryetar bashkie. Në emisionin ‘Studio Live’ në Report Tv, Spahiu tha se një nga arsyet që DASH ka shpallur non grata Berishën, është presioni që u bën institucioneve të drejtësisë.

‘Çfarë do të ndodhte sikur socialistët të bënin protestë pas çdo arrestimi të një kryetari bashkie, ministri apo deputeti, pse ne e shikojmë normale protestën vetëm kur ka akuza për Sali Berishën. Një nga arsyet që DASH ka shpallur non grata Berishën është presioni që u bën institucioneve të drejtësisë. Berisha me klanin e tij ushtrojnë presion ndaj drejtësisë dhe institucioneve.’- tha Spahiu

Juristi Kreshnik Spahiu me tone të larta thotë se populli shqiptar nuk meriton as këtë qeveri, dhe as këtë opozitë. Në një intervistë për emisionin ‘Studio Live’ në Report Tv, Spahiu tha se edhe qeveria edhe opozita janë tagër i hetimit të SPAK. Spahiu tha për gazetarin Arbër Hitaj se shqiptarët do të meritonin një alternativë të re më të ndershme duke larguar idhujt e tyre të cilët i kanë zhgënjyer.

‘Jemi përballë një situatë ku dy subjekte politike gjejnë forma për ta goditur prokurorinë, ky popull nuk e meriton as këtë qeveri dhe as këtë opozitë. Qeveria dhe opozita janë tagër i hetimit të SPAK, kemi një opozitë ku tre liderët e saj, janë në dosje penale dhe në hetim. A e meriton populli shqiptar të ketë një qeveri gjysmë të arrestuar apo në hetim, shqiptarët do të meritonin një alternativë të re më të ndershme duke larguar idhujt e tyre të cilët i kanë zhgënjyer. Këta janë peng i drejtësisë. Këta nuk kanë sovranitet asnjëherë. Njëri lëpihet dhe tjetri i shpall luftë pushtetarëve.’- tha Spahiu.

Juristi Kreshnik Spahiu thotë se Prokuroria e Posaçme e ka favorizuar Sali Berishën. I ftuar në emisionin ‘Studio Live’ në Report Tv me gazetarin Arbër Hitaj, Spahiu tha se fakti që nuk janë në arrest me burg, po arrest shtëpie, ka të drejtë që të mendoj se SPAK po e favorizon.

‘Dhëndri është në një akuzë më të rëndë sesa vjehrri, ndërkohë që vjehrri ka qenë në detyrë. Është jo e logjikshme që vjehrri të ketë një akuzë më të lehtë se dhëndri. SPAK e favorizon Sali Berishën, a e favorizon për shkak të frikës për lidhjet që ka Berisha, apo një lloj përkëdhelje politike, kjo i përket një lloj analize tjetër. SPAK jo që nuk e ka persekutuar por e ka favorizuar. Çdo subjekt tjetër që është në akuzë për korrupsion pasiv apo pastrim parash, është në burg. Fakti që nuk janë në arrest me burg, po arrest shtëpie, unë kam të drejtë të them se SPAK e favorizon Berishën. Fakti që e ka vonuan 3-4 vite ka pasur frikë ta vendosë në akuzë. Tregon faktin se Berisha është favorizuar nga SPAK, të dy janë në shtëpi.’- tha Spahiu.