Ata janë kudo bashkë dhe tashmë mjaft të njohur në rrjetet sociale. Udhëtojnë e promovojnë vendet shqiptare, ndërsa në blogun e tyre shumë të klikuar “Il mio viaggio in Albania – Udhëtimi im në Shqipëri” ndajnë pjatat tradicionale që mund t’i shijosh në çdo cep të Shqipërisë sonë të bukur. Përveç kulinarisë, sporti është një tjetër pasion që i bashkon, duke i bërë shpesh pjesë e sfidave dhe aktiviteteve sportive që i ndajnë me ndjekësit e tyre. Emiliano, një italian nga Roma, dhe Silvana, një shkodrane plot energji, janë partnerë në jetë dhe në biznes. Ata kanë vendosur që copëza nga përditshmëria e tyre të jenë pjesë e blogut, duke u kthyer shpesh në udhërrëfyes për këdo që dëshiron të eksplorojë vendin. Një çift simpatik që nuk harron të na dhurojë edhe të qeshura. Por si ka nisur historia e tyre e dashurisë, si lindi ideja e blogut dhe si është jeta e tyre në Tiranë? Këtë na e rrëfejnë vetë ata në studion e Rreze Dielli.