Bashkatdhetarë të të gjitha trojeve u bënë bashkë për të festuar dhe gëzuar ditët historike për komunitetin shqiptar të Kanadasë, përmes festimeve të shumta, në nder të kulturës dhe traditave të vendit. Këtë vit, festimet u kryen në parlamentin e vendit, teksa ky i fundit ka pranuar për shqyrtim projektligjin për të shpallur nëntorin, muajin e trashëgimisë kulturore shqiptare. Në një lidhje skype nga Otava, Presidentja e Nderit e Shoqatës Shqiptaro Kanadeze, dr. Ruki Kondaj tha se ky është një lajm domethënës për shqiptarët dhe intelektualët e diasporës. "Personalisht si dhe shoqata jonë, mbarë shqiptarët i janë mirënjohës Deputetes Laura Albanese për marrjen përsipër dhe realizimin me sukses të këtij projekt ligji ku nëntori shpallet muaji i Trashëgimisë Shqiptare në parlament" - u shpreh ndër të tjera znj. Kondaj.
