I vranë djalin natën e Bajramit, nëna nuk shkon dot ta qajë as tek varri, ku prehet i riu nga Tropoja. Dy vite pas vrasjes së 23-vjeçarit Florian Selimi, mbrëmjen e 11 gushtit të vitit 2019 në fshatin Sulaj të Fierit, nëna e të riut Dukate Selimi, për të cilën plaga mbetet e hapur, kërkon drejtësi. Ajo thotë se ndjehet e kërcënuar nga dy personat me iniciale S.S, 26 vjeç dhe K.M, 20 vjeç, banues në fshatin Sulaj, të cilët u arrestuan si të dyshuarit për vrasjen e Florianit, trupi i pajetë i të cilit u gjet në një kanal. Nëna e të riut që mbeti i vrarë me thikë, dërgoi një letër në adresë të emisionit ’Pa Gjurmë’ ku kërkon ndihmën e medias për situatën në të cilën ndodhen. Dukate Selimi dëshmon ekskluzivisht për ‘Pa Gjurmë’ në Report Tv se autorët e dyshuar për vrasjen e të birit ndodhen jashtë hekurave. Edhe pse Gjykata e Apelit Fier, la masën e sigurisë ’arrest me burg’ për dy të rinjtë në muajn mars 2020, sipas nënës së 23-vjeçarit të vrarë ata lëvizin lirisht në fshat. Këtë dëshmi e dokumenton me disa foto, ku sipas asaj dallohet qartë njëri prej autorëve të dyshuar, i cili në prill të këtij viti ka qenë prezënt në mitingun e zhvilluar në Fier, gjatë fushatës për zgjedhje të PD-së. Kam këtë foto që po ta shihni është një nga djemtë që vrau djalin tim. Ai ka marrë pjesë në mitingun e PD-së, madje ka qenë përkrah kandidatin për deputet në qytetin e Fierit. Ne ndjehemi shumë të kërcënuar. Pasi jo vetëm ata, por edhe shumë të tjerë na dalin me armë. Vëllain tim kanë dashur ta vrasin 10 ditë më parë, pasi vëllai im ka bërë një denoncim për kërcënimet me armë që ka marr. Dukate Selimi denoncon një tjetër ngjarje, që ka ndodhur në prill të këtij viti në fshatin Sulaj, ku sipas saj, të njëjtët persona që i vranë djalin kanë plagosur edhe një bashkëfshatar. Ajo vë në dispozicion videon ku bashkëshortja e të plagosurit është marr në pyetje nga oficeri i policisë gjyqësor në spital, duke dëshmuar për ngjarjen.