Esmeralda Nexhipi, një nënë nga Fieri ka vendosur të rrëfejë në ‘Pa Gjurmë’ sesi ka duruar 5 vite dhunë nga bashkëshorti i saj, e ndërsa sot ka mbetur e vetme me dy fëmijët e saj të mitur 4 dhe 5 vjeç. 27-vjecarja u martua në vitin 2015 me shkuesi me Lirim Nexhipin 35-vjeçari po nga qyteti i Fierit. Pas dy vitesh martesë, pasi erdhi në jetë djali i parë në vitin 2017, Esmeralda përballet me një realitet krejt ndryshe nga ai çka e kishte imagjinuar. Për zënka të momentit Lirimi arrinte deri në dhunë, duke goditur bashkëshorten e tij. Edhe pas ardhjes në jetë të djalit të dytë në vitin 2018, sërish dhuna ishte e pranishme, madje edhe në sy të dy fëmijëve të mitur. E pajisur 3 herë me urdhër mbrojtje, 27-vjeçarja vendos t’i japë fund martesës në korrik të 2021 duke hapur një proces divorci. Edhe pse nëna e 2 fëmijëve e ka falur disa herë bashkëshortin e saj me shpresën se ai do të ndryshonte, gjë e cila nuk ndodhi kurrë, në shtator të 2021 Lirimi merr valixhet dhe largohet duke mos e kthyer më kokën pas as për dy djemtë e tij. Për dy javë ai qëndron tek nëna e tij, ndërsa më pas emigron drejt Gjermanisë. Me fëmijët kontakton vetëm kur ata shkojnë tek gjysherit, pasi me Esmeraldën ka ndërprerë çdo kontakt, duke mos u përgjigjur më as për fëmijët. Sot Esmeralda jeton vetëm me dy djemtë e saj të mitur me qira por ata rrezikojnë të dalin nga shtëpia pasi nuk kanë asnjë mundësi për ta paguar. Nga nevoja për t'u kujdesur për dy fëmijët e mitur ajo e ka të pamundur për të punuar. Prej muajsh 27-vjeçarja jeton pa energji elektrike, dhe si të mos mjaftonte kjo ka edhe borxhet e bashkëshortit për të cilat ndihet e kërcënuar pasi i kanë mbetur asaj mbi supe.