Në studion e “Rreze Dielli” mirëpresim sot një personazh atipik, plot humor, energji pozitive dhe gjithmonë të gatshëm për të krijuar situata argëtuese. Por ajo që e bën edhe më të veçantë Françesko Shehun është fakti se ai ka zgjedhur ta ndajë rrugëtimin e tij të jetës me dy miq shumë të dashur, të cilët i ka gjithmonë pranë dhe i merr kudo me vete: Pumën dhe Pepiton! Françesko, me profesion menaxher marketingu, vjen për të ndarë me ne emocionet, aventurat dhe historitë e veçanta me dy shoqëruesit e tij të pandarë. Ata janë gjithmonë tre: bashkë në udhëtime, në plazh, në festa, në gëzime dhe në çdo moment të jetës së përditshme. Një treshe që ka kthyer dashurinë për kafshët në një mënyrë jetese! Nga shpenzimet mujore prej 50 mijë lekësh për kujdesin ndaj qenit, te ndryshimi rrënjësor i jetës pas ardhjes së tij në shtëpi, Françesko rrëfen pa filtra përkushtimin dhe dashurinë që i lidh. Madje, për 5-vjetorin e Pumës ka organizuar edhe një festë me plot 70 të ftuar! Një histori plot dashuri, përkushtim, humor dhe aventura, ku Françesko, Puma dhe Pepito na tregojnë se miqësia më e bukur vjen në forma nga më të veçantat.