Problemet me tretjen janë bërë gjithnjë e më të zakonshme. Fryrja e barkut pas vakteve, gazrat, dhimbjet abdominale, kapsllëku apo diarreja janë shqetësime që ndikojnë në cilësinë e jetës së shumë njerëzve. Shpesh, edhe kur analizat rezultojnë normale, simptomat vazhdojnë, duke i shtyrë pacientët të kërkojnë zgjidhje përmes ndryshimeve në mënyrën e të ushqyerit. Një nga qasjet ushqimore që ka tërhequr vëmendjen e specialistëve është dieta FODMAP, e cila përdoret kryesisht për menaxhimin e simptomave tek personat me zorrë të ndjeshme dhe sindromën e zorrës së irrituar. Por çfarë është në të vërtetë kjo dietë, si funksionon dhe a është e përshtatshme për të gjithë? Për t'iu përgjigjur këtyre dhe shumë pyetjeve të tjera, flasim në “Rreze Dielli” me nutricionistin dhe ekspertin e mjekësisë holistike, Altin Joka. Diskutojmë për dietën FODMAP, përfitimet dhe kufizimet e saj, gabimet që duhen shmangur, si edhe për mënyrat më të mira për të mbajtur një zorrë të shëndetshme në afat të gjatë, përfshirë rolin e probiotikëve, kefirit dhe ushqimeve të fermentuara.