AXHEM PILAF
Përbërësit:
350 gr oriz
1 limon (lëngu)
1 qepë e prerë hollë
1 filxhan kafe fidhe
2 lgj vaj ulliri
2 lgj gjalpë
1 liter buljon perimesh/mishi/ujë
Djathë i fortë i grirë
Kripë, piper
Përgatitja:
Lajmë orizin mirë derisa uji të dalë i pastër dhe më pas i shtojmë lëngun e 1 limoni. Vendosim në sobë tenxheren me vaj ulliri dhe gjalpë. Sapo gjalpi të shkrijë hedhim fidhet dhe i kaurdisim derisa të marrin ngjyrë të njëtrajtshme të kuqerremtë. Shtojmë orizin dhe e përziejmë mirë derisa të zbardhet. Më pas vendosim qepën e grirë imët dhe e kaurdisim për 2-3 minuta. Shtojmë buljonin, ulim nxehtësinë dhe e lemë orizin të ziejë me kapak gjysmë të hapur për 20 minuta. Shtojmë kripë dhe piper dhe sapo të krijohen gropëzat e vogla sipër orizit fikim sobën dhe i vemë sipër një pecetë të pastër, pasi kemi vendosur pak gjalpë. E shërbejmë me djathë të fortë kaçkavall.
DOMATE TË MBUSHURA
Përbërësit:
6 domate
100 gr djathë të bardhë ose gjizë
100 gr ajkë kosi
Spec djegës i bluar
Bishta qepësh të njoma
Majdanoz
Kripë, piper i zi
Përgatitja:
Domateve u pritet kapaku, pastrohen brenda, i kriposim dhe i përmbysim. Përgatisim mbushjen me djathë të bardhë, ajkë kosi, majdanoz, pjesën jeshile të qepëve të njoma, spec djegës të bluar në mikser, kripë dhe piper të zi. Mbushim domatet dhe i kemi gati për t'i servirur.