E braktisur nga babai biologjik 1 muaj para se të vinte në jetë, sot 25 vite më pas, kjo vajzë e re kërkon të thyejë heshtjen dhe të rrëfejë historinë e dhimbshme të jetës së saj. 25-vjeçarja nga Durrësi që prej momentit kur lindi deri në moshën 12-vjeçare jetoi me nënën dhe njerkun, pa e ditur që ky I fundit nuk ishte babai I saj biologjik. Një fatkeqësi që ndodhi në familjen Kulla bëri që vajza e mitur të mësonte të vërtetën që do i brengoste zemrën. Nëna e saj Nasybe Kulla në vitin 2009 pësoi një aksident automobilistik, I cili I la pasoja të rënda në kokë e pavarësisht operacionit, ajo nuk I mbijetoi dot plagëve të marra dhe ndërroi jetë. Pas braktisjes nga babai biologjik dhe vdekjes së nënës, Xheni merr një tjetër goditje në jetë. E mitura braktiset edhe nga personi që e rriti, Fadil Kulla, e kështu kujdestarinë e saj e mori daja. E vogël asokohe, ajo nuk e kuptonte pse personi që ajo për 12 vite i thërriste baba, u largua pa dhënë asnjë shpjegim. Nuk kaloi shumë kohë dhe gjatë një feste familjare, Xheni mësoi se nuk ishte vajza biologjike e Fadilit, por se ai kishte qenë partneri I nënës së saj. Një lajm të tillë 13-vjeçarja nuk e priti aspak mirë, e kështu e vetmja strehë e ngrohtë ishte shtëpia e dajës së saj, atje ku jeton edhe sot. Jeta nuk u tregua shumë bujare me vajzën nga Durrësi, duke I mohuar asaj shumë momente të gëzueshme. Njerku që e rriti do të ndërronte jetë në vitin 2014, ndërsa 4 vite më pas, për herë të parë në jetën e saj do të shfaqej babai biologjik. I penduar për veprimet e së shkuarës, ai I është gjendur pranë vajzës në momente të vështira, por tashmë ka krijuar një jetë të re nga e cila ka tre fëmijë. Sot Xheni dëshiron që të krijojë një jetë të sajën, por në kushtet në të cilat ndodhet e ka të pamundur. Shtëpia që ka në Durrës është rrënuar dhe është e pabanueshme, ndërsa edhe pse ka mbaruar shkollën e lartë, nuk ka mundur të gjejë punë në profesionin e saj.