Luljeta Ibrahimi është një 54-vjeçare nga Elbasani e cila dergjet në shtrat prej 4 vitesh. Bashkëshorti i saj Fluturak Ibrahimi 56-vjeç është i vetmi që kujdeset për të ku si pasojë nuk mundet as të punojë. Kjo gjendje e Luljetës ka nisur 10 vite më parë kur ajo u diagnostikua me diabet dhe që atëherë gjendja e saj ka nisur të përkeqësohet. Ishte viti 2020 kur çifti Ibrahimi nga Elbasani shkuan në Gjermani për një mjekim më të specializuar. Për shkak të diabetit, 54-vjeçares u desh t’i prisnin njërën këmbë. Ajo gjithashtu ka humbur dhe shikimin 100%. Por ajo që e bën më të rëndë është denoncimi i bashkëshortit se bluzat e bardha i kanë thyer shtyllën kurrizore gabimisht gruas së tij. Për këtë Luljeta ka përfunduar në gjendje shtrati e paralizuar. Në vitin 2023, pas 3 vitesh qëndrimi në shtetin Gjerman, Fluturakut bashkëshortit të 54-vjeçares bluzat e bardha i hoqën të gjitha shpresat për Luljetën, të cilët pohuan se vetëm disa ditë jetë i kishin mbetur. Në të tilla kushte Fluturaku bashkë me gruan u kthyen në Shqipëri, ndërsa jetojnë me qira në Elbasan. Jetesa për kryefamiljarin është tepër e vështirë pasi i duhet t’i shërbejë bashkëshortes së tij në çdo o moment të ditës dhe nuk mundet të punojë për të siguruar jetesën. Të dy janë prindër të dy fëmijëve 35- dhe 28-vjeçarë të cilët janë martuar dhe kanë krijuar familjet e tyre. I sfilitur dhe i pamundur për të përballuar më jetesën e vështirë, Fluturak Ibrahimi i është drejtuar emisionit ‘Pa Gjurme” për ndihmë.
