Fatkeqësitë e njëpasnjëshme të ndodhura në familjen Çorbaxhiu, kanë bërë vajzën e kësaj shtëpie të kërkojë ndihmën e “Pa Gjurmë” për të dërguar të ëmën në një azil. Një familje e varfër, në fshatin Moglicë të Korçës… u përballën me një tragjedi që do të shënjonte jetët e tyre 13 vite më parë. Ishte data 28 shtator 2011 kur djali i vetëm i kësaj familje, 16-vjeçari Romeo u gjet i varur në banesën e fqinjit, ku asokohe nuk banonte asnjë. Askush nuk di të thotë nëse ishte një vrasje e qëllimshme apo një vetëvrasje por hallet dhe pamundësia ekonomike që kishin, bëri që kjo familje ta linte në heshtje këtë ngjarje duke e mbyllur aty. Ai ishte një djalë që në dijeni të familjes nuk kishte asnjë konflikt apo nuk kishte shfaqur asnjë shqetësim, prandaj vdekja e tij e papritur ngren pikpyetje të mëdha edhe sot e kësaj dite. Për t’iu larguar atij vendi i cili u sillte kujtime të hidhura, familja Çorbaxhiu u shpërngulën në Bathore të Tiranës, në një shtëpi që ua dha një i afërm i tyre.
