Aty ku është Mario është edhe Lusi dhe aty ku është Lusi është edhe Mario. Një simbiozë dashurie që kalon kufijtë e të pamundurës. E nëse flasim për dashuri pa kushte ky është çifti ideal që mishëron këtë togfjalësh që simbolizon shumë për ta. Një postim në facebook u bë shkak i njohjes së të riut italian 33-vjeçarit Mario dhe Lusit 30-vjeçares shqiptare nga Lezha Lusi. Në një nga grupet e rrjetit social ku aplikohej për punë Mario kërkonte një person që të mund të kujdesej për të. Një përgjigje i vjen nga përtej Adriatikut, kur Lusi e cila ishte në kërkim të një pune do të emigronte drejt italisë, në prill të vitit 2019 për të pranuar këtë ofertë. Por bashkë me këtë ofertë dy muaj më pas do të lindte dhe një histori e bukur dashurie. I riu italian që prej vitit 2008 jetonte në një karroce me rrota pas një aksidenti. Fillimisht nguroi, po vendosi të marr guximin për t’i shprehur Lusit ndjenjat e tij të dashurisë. "Po"-ja e saj do të ishte një çlirim që di t’i ndryshonte tërësisht jetën. Që nga ai moment ata nuk janë ndarë kurrë, derisa në gusht të vitit 2021 kurorëzuan dashurinë e tyre në martesë. Këtë dashuri të pakufishme e mbajnë gjallë edhe përmes fotove dhe videove që realizojnë çdo ditë. Në rrjetet sociale, ato publikojnë pafundësisht foto ku shfaqen gjithnjë pranë njëri-tjetrit teksa shijojnë çdo moment të jetës. Ajo që bie në sy është se dy të rinjtë gjithmonë kombinojnë veshjet e tyre duke i dhënë edhe më shumë veçanti lidhjes së tyre. Jo vetëm, Mario ia shpreh edhe në shqip dashurinë Lusit të tij. Sot në këtë ditë të dashuruarish, të dy kanë vendosur që të rrëfejnë historinë e tyre në studion e "Pa Gjurmë" për të përcjellë një mesazh të fortë.