Në një kohë kur fëmijët kalojnë gjithnjë e më shumë kohë përpara ekraneve dhe më pak në natyrë, kopshtaria po shfaqet si një mënyrë e thjeshtë dhe efektive për t’i afruar ata me mjedisin. Marcela Tringaj juriste në profesion dhe e apasionuar pas tokës dhe natyrës, për "Rreze Dielli" thekson rëndësinë e rikthimit të fëmijëve te natyra, përmes projekteve të vogla të kopshtarisë që zhvillojnë durimin, ndjeshmërinë dhe përgjegjësinë. Përmes mbjelljes së farave, kujdesit për bimët dhe vëzhgimit të ciklit të jetës në tokë, fëmijët mësojnë vlera jetësore dhe ndërtojnë lidhje të qëndrueshme me ambientin. Kopshtaria nuk është vetëm një aktivitet, por një formë edukimi që ndihmon në zhvillimin emocional, social dhe mendor të fëmijëve!