Dikur një familje plot harmoni, një jetë të mbushur me dashuri. Në fshatin Bishnicë, Basirja dhe Eqerem Shuli kishin ndërtuar një jetë të re, një strehë të ngrohtë që prej vitit 2012 kur lidhën kurorë. Njohja mes tyre ishte krejt rastësore, ndërsa 39-vjeçarja nga Mokra e Pogradecit vinte nga një martesë e vështirë, nga e cila ka dy fëmijë të rritur, të cilët jetojnë me të atin. Ajo vendosi të divorcohej dhe të kthehej në shtëpinë e prindërve, aty ku u njoh me Eqeremin, i cili gjithashtu vinte ngë një tjetër martesë nga e cila ishte baba i dy fëmijëve që jetojnë me nënën e tyre. Me histori thuajse të ngjashme, fati bashkoi çiftin nga Pogradeci, kur burri nuk hezitoi t’i kërkonte dorën gruas që do të ishte bashkëshortja e tij e ardhshme. Ata u bënë prindër të dy vajzave, 4 dhe 9 vjeçe. Te dy punonin në bujqësi, ndërsa bashkëshorti ishte kthyer nga emigrimi për të qenë më afër familjes së re. Por këto çaste idilike do të merrnin fund shpejt, kur një rrufe në qiell të hapur do të vriste gëzimin e ditëve të qeta dhe zemrën e bashkëshortes dhe vajzave të vogla. Edhe pse mes tyre kishte harmoni, ajo që trazonte shpesh marrëdhënien ishin konfliktet e nuses me familjarët e burrit. Ata nuk e kishin pranuar që prej fillimit këtë martesë dhe sherret ishin kthyer në një ritual të zakonshëm, deri kur dy vite më parë Eqeremi u diagnostikua me një sëmunje të rëndë nga e cila nuk gjeti dot shpëtim. 56-vjeçari ndërroi jetë afro dy muaj më parë dhe fill pas kësaj fatkeqësie në familjen Shuli, absurdja janë akuzat e hedhura me nusen se është ajo shkaktarja e vdekjes së Eqeremit. Sot, Basirja e mbetur me dy fëmijë jetimë kërcënohet dhe dhunohet nga familjarët e bashkëshortit të ndjerë, të cilët nuk e lejojnë as të dalë në tokat e familjes për të siguruar të ardhura nga puna në bujqësi. Kunati e shantazhon në telefon, ndërsa kunata ka tentuar ta dhunojë me mjete të forta. 39-vjeçarja ka bërë kallëzim në polici, ndërsa ka kërkuar edhe urdhër mbrojtje. Pa mbështetje dhe krejt e vetme ajo i drejtohet emisionit ’Pa Gjurmë’, ku kërkon ndihmë dhe përkrahje, pasi rrezikon të përfundojë në qiell të hapur.