Kronikë

Policia e Shtetit ka bërë ‘bilancin’ për muajin gusht, ku njofton se ka finalizuar 137 operacione, si dhe ka vënë në pranga 794 autorë të dyshuar për vepra të ndryshme penale. Po ashtu janë vënë në pranga 324 drejtues mjetesh dhe janë pezulluar 516 leje drejtimi.

Një bombol gazi ka rrezikuar jetën e një familje në një banesë në lagjen “Pavarësia”, Vlorë. Rrjedhja e gazit ka shkaktuar përfshirjen e disa orendive shtëpiake nga flakët, të cilat janë shuar falë ndërhyrjes në kohë të forcave zjarrfikëse.

Një 41-vjeçar i shpallur në kërkim është arrestuar në Vlorë, pasi dyshohet se në bashkëpunim me dy persona të tjerë kanë djegur qëllimisht 3 automjete në muajin korrik. Në pranga ka rënë Elton Lushaj, 41 vjeç, i cili dyshohet se ka bashkëpunuar për të djegur qëllimisht tre automjete.

Një 41-vjeçar është vënë nën hetim nga policia, si autori i dyshuar i zjarrvënies në fshatin Fikas, të Elbasanit ku u dogj një sipërfaqe toke me barishte dhe shkurre.

Dy persona janë vënë në hetim pasi tentuan t’i ofrojnë ryshfet punonjësit të policisë.Ata janë ndaluar teksa kanë qenë në shkelje dhe kanë tentuar të korruptojnë policin me nga 50 euro. 

Një 43-vjeçar është vënë nën hetim nga uniformat blu të Gjirokastrës, pasi akuzohet se ka ngacmuar seksualisht një 74-vjeçare në banesën e saj.

 Tre persona janë shpallur në kërkim, pasi dyshohet se me datë 28 gusht në një zyrë avokatie në Tiranë kanë vjedhur një shume parash prej 9 mijë euro.

Nga

Sokol Dema

Një 37-vjeçare është vrarë me thikë nga motra e saj. Amanda Pushani është gjetur e vdekur në banesën e saj në rrugën 'Hajdar Hidri' në Tiranë.  Policia ka arrestuar autoren e dyshuar Marsela Pushani, me profesion mësuese. Shkak i vrasjes është bërë një konflikt, ku autorja i ka kërkuar motrës që të linte alkoolin, por sherri ka agravuar. 

Një aksident me pasojë vdekjen është regjistruar gjatë natës në aksin Elbasan-Tiranë, ku një 58-vjeçare ka humbur jetën. Shkak i aksidentit është bërë një drejtues i cili ka qenë në gjendje të dehur dhe është përplasur me mjetin që po udhëtonte 58-vjeçarja. Po ashtu një aksident tjetër ndodhi në Korçë, por vetëm me dëme materiale. 

Një 80-vjeçar dyshohet se është mbytur në lumin Devoll në fshatin Rrenas të Belshit. Kanë qenë familjarët e 80-vjeçarit R. A., që kanë denoncuar në polici, pasi kanë humbur kontaktet me të moshuarin që prej datës 31 gusht.