Basha: Berisha i shqetësuar nga rikthimi im! Ish deputeti demokrat i bën thirrje: Kafsho 'ujkun'! Duhej ta kishe bërë në 2013, por dhe tani na ke prapa

Lulzim Basha ka ditë që teston mbështetjen tek demokratët në takimet në bazë por duket që prova e madhe do të jetë të martën, në mbledhjen e kryesisë së PD-së.

Si në çdo takim, as në atë të Kamzës, Basha u rezervua të thoshte nëse ishte gati të merrte drejtimin e PD-së duke i kujtuar demokratëve se tashmë ishte një kryetar i dorëhequr dhe gjithçka do të varej në mbledhjen e kryesisë

“Më ke vënë në pozitë të vështirë..“ tha Basha kur një demokrat iu drejtua: “Ne me ty jemi nuk e dimë tani, ti sa do të jesh me këta njerëz!

LEXO EDHE:
Bllokimi i aksioneve dhe dalja në ankand, KF Tirana: Dezinformim i qëllimshëm, synon tjetërsimin e aseteve të klubit

"Unë jam kryetar I dorëhequr për të mos i paraprirë cfarëdovendimi që do të marrin insttiucionet e PD-së. Ata kanë të drejtën e detyrimin të flasin lirisht e të marrin vendimet e duhura që pastaj PD do ti zbatojë për të nisur procesin e ringritjes. Di të them që kudo që kam shkuar jam mahnit nga shpirti i qëndresës pas 1.5 vite shumë i vështirë"- shtoi ish kryedemokrati.

Nga demokratët që e mbështetën mori mesazhin e qartë. Të korrigjonte gabimin që bëri 10 vite më parë kur erdhi në krye të PD pasi fitoi garën përballë Sokol Olldashit, 23 korrik 2013.

"Këtë që po bën sot, iniciativën tënde për tiu vërsulur ujkut, duhej ta kishe kafshuar ujkun në 2013. Janë shumë vite të humbura. Por më mirë vonë se kurrë," - i tha ish deputeti demokrat Korab Lita 

Vetë Basha pranoi përgjegjësinë që lejoi drejtimin për 8 vjet të partisë i dubluar me Sali Berishën si "një makinë me dy timonë që garanci të sigurtë ka aksidentin" 

"Në 2013 kurrë nuk ma kishte marrë mendja që njeriu në të cilin kishim investuar dhe besuar gjithçka në një moment mund të vendoste interesat personale mbi ato të demokratëve dhe kombëtare. Kush nga ne këtu nuk është mësuar dhe rritur me vlerat familjare të të nderuarit të të moshuarit. Unë kështu jam rritur, ti jepet vendi i nderit, ti dëgjohet fjala. Nganjëherë se mosha bën të vetën kur thotë ndonjë fjalë që nuk qëndron bën sikur nuk e dëgjon por kurrë, kurrë nuk e kisha menduar që gjatë kohës që e kishim vendosur në një vend nderi do të vazhdonte të mendonte për interest dhe hallet e veta. Ai dhe një grup njerëzish. Padiskutim që kjo është përgjegjësia ime dhe këtu ke të drejtë" 

Pastaj iu rikthye retorikës së vjetër të përdorur ndaj Berishës, Metës dhe Ramës duke i cilësuar si ‘trekëndëshi i Bermudës’. Ish kryedemokrati  tha se të tre, si Berisha ashtu si Meta dhe Rama janë të shqetësuar nga rikthimi i tij në politikën aktive dhe nga propozimet që pari duke parë rezultatet e zgjedhjeve të 14 majit.  

“Nuk është vetëm ai që është shqetësuar nga dalja ime. Shumë janë shqetësuar nga dalja ime, sepse e kanë monopolizuar debatin publik, duan të dalin vetëm ata të tre dhe kukullat e tyre. Janë shqetësuar shumë. Thelbi i propozimeve të mia është që ajo që i ka ndodhur Shqipërisë në 2008-ën të zhbëhet. Kjo i shqetëson, duan monopol mbi politikën, median, ekonominë. Duan që Shqipëria të mbetet çifligu i këtyre tre personave”- tha Basha.  

Ndërkohë ai tha se sulmet e Berishës ndaj tij vijnë si përpjekje e kreut të Rithemelimit për të hequr vëmendjen nga humbja e thellë në 14 maj ku në bashkëpunim me Metën arriti të merrte vetëm 7 bashki.

“Me sulmet ndaj meje përpiqet të heqë vëmendjen nga humbja në 14 maj,. Mundësia e dytë është që ta ketë humbur vetë fare. Por për mua është kapitull i mbyllur që unë e kam lënë pas. Duhet të shqetësohemi për të nesërmen”-shtoi Basha.

Një tjetër rezervë, Basha e kishte edhe për kandidatët e Metës dhe Berishës për të cilët tha se kanë qenë të paracaktuar dhe se nuk janë zgjedhur nga procesi i Primareve. Ndërsa ironizoi edhe koalicionin e Metës dhe Berishës në zgjedhjet e 14 majit, duke e quajtur ‘bashkimi për dështim’.

"Bashkimi për Fitore ose më saktë bashkimi per Dështim, shpallën të ashtuquajturën “Primaret”. Këtu në Kamez njëri u tërhoq. Tjetri tha procesi tha ishte i manipuluar. Procesit të primareve, vetëm emri i mbeti i tillë, prodhoi pakëanaqësi të shumta. Ju e patë që u votua në primare nga militantët e PS. Ndërkohë që kandidati që doli nga i ashtequajturi process i primareve një kandidat i gjymtuar nga çdo pikëpamje. A doni te futemi edhe me thellë? Të ashtuquajturit kandidatë të primareve ishin paracaktuar nga njerëz me damkë me korrupsion gjatë 8 vjeçarit të qeverisjes tonë. Nuk kemi asnjë fytyrë të dalim para shqiptarëve dhe tu kërkojmë rrotacion për të hequr disa hajdutë dhe për të vënë disa të tjerë që u kanë mbaruar lekët që kanë vjedhur gjatë kohës që PD ka qenë në qeveri. Duhet të ndahemi nga këta individë”- u shpreh Basha.

Që pas zgjedhjeve të 14 majit, pasi Alibeaj dha dorëheqjen nga posti i kryetarit të komanduar, Basha është rikthyer në skenën active politike, me takime në qytete të ndryshme të vendit, duke nënkuptuar se mund të kandidojë për kreun e PD-së. Gjatë takimeve të tij, ai ka paraqitur një platformë me 3 pika që sipas tij është emergjente për daljen e vendit nga situata ku ndodhet: Lista të hapura, Kryeministër me 2 mandate dhe veting politikanëve

Rendit zhvillimet sipas orarit:

Të Fundit Të Parat

B.V/S.G/Shqiptarja.com

TAG:
• lulzim basha
• PD
• kamez
• Tirane
• edi rama
• sali berisha
• Ilir Meta