TIRANE-Pas rritjes së shifrave të të infektuarve në 24 orët e fundit, kryetari i PD-së, Lulzim Basha kërkon nga qeveria që të shpallë gjendjen e fatkeqësisë natyrore në të gjithë vendin dhe të mbyllë call center, fasoneritë dhe sipërmarrjet e tjera me numër të madh punonjësish në një hapësirë të mbyllur që kanë probabilitet të lartë për të përhapur virusin. Për biznesin, lideri demokrat kërkon që të hartohet një tjetër plan masash i detajuar dhe me afate të mirëpërcaktuara për mënyrën e operimit të atyre që janë të domosdoshme për jetën e qytetarëve. Gjithashtu për qytetarët, Basha kërkon marrjen e masave të menjëhershme për t'u garantuar kushtet jetike për shkak të pamundësisë për të punuar.

'Shifrat e të prekurve nga COVID 19 po rriten. Prandaj shtohet nevoja për të ndërmarrë një plan të detajuar masash për parandalimin e përhapjes së shpejtë të virusit. Pa u bërë tepër vonë duhet vepruar për ti dalë të keqes përpara.

Duhen marrë masa të menjëhershme:

1. Të shpallet gjendja e fatkeqësisë natyrore në të gjithë territorin e Republikës së Shqipërisë. Të mbyllen call centers, fasoneritë dhe sipërmarrjet e tjera me numër të madh punonjësish në një hapësirë të mbyllur që kanë probabilitet të lartë për të përhapur virusin.

2. Të hartohet një plan masash i detajuar dhe me afate të mirëpërcaktuara për mënyrën e operimit të bizneseve që janë të domosdoshme për jetën e qytetarëve.

3. Marrjen e masave të menjëhershme diktuar nga gjendja e jashtëzakonshme për të garantuar kushtet jetike për të gjithë qytetarët që për shkak të pamundësisë për të punuar nuk përballojnë nevojat e përditshme.

Ne duhet të bëjmë gjithçka për ta kaluar me sa më pak dhimbje këtë situatë të vështirë. Qytetarët duhet të vazhdojnë të qëndrojnë në shtëpi ndërsa qeveria duhet t'u japë siguri për të përballuar jetesën e tyre" shkruan Basha.

Ky është plani i dytë që propozon Lulzim Basha, pas atij me tetë pika para disa ditëve që nuk u mor në konsideratë nga qeveria, pasi sipas kryeministrit Edi Rama fatura shkonte 1 miliard e 177 mln euro. Në datë 19 mars, qeveria miratoi një paketë masash me shtatë pika për përballimin e situatës me një faturë rreth 300 mln euro.