U infektua në QSUT, vdes ish-hetuesi në komunizëm! 4 humbje jete në 24 orë, 50 raste të reja, infektohet edukatorja në Laprakë! Mbyllet kopshti në Vlorë

TIRANE-Rëndohet bilanci nga COVID-i në Shqipëri. Një 69-vjeçar nga Kruja i shtruar te Infektivi ndërroi jetë duke e çuar në 42 numrin e viktimave në total nga fillimi i pandemisë, teksa 4 humbën betejën me sëmundjen vetëm në 24 orët e fundit, 3 dje dhe një sot. Pacienti që ndërroi jetë sot është një 69 vjeçar nga Kruja me leukozë akute, i prekur nga Covid19.

Report Tv mëson se pacienti nga Kruja që ndërroi jetë te Infektivi ka qenë me profesion noter dhe u infektua në QSUT ku shkoi për t'u kuruar nga leucemia akute. Avdi Vathi ka qenë hetues në degën e brendshme me survejimin e diplomatëve të huaj në vendin tonë në kohën e diktaturës.

Ministria e Shëndetësisë thotë se pavarësisht mjekimit intensiv prej 10 ditësh dhe përpjekjeve të stafit mjekësor, nuk arriti të mbijetojë. Ky është personi i dytë nga rrethi i Krujës që ndërron jetë nga koronavirusi. Para rreth një muaji ndërroi jetë një shitës, i cili kishte sëmundje bashkëshoqëruese.

Ndërkohë që në 24 orët e fundit ka rritje të të shtruarve në spitalin infektiv. Aktualisht po marrin shërbim 64 pacientë, 7 prej tyre janë në terapi intensive ndërsa 1 është i intubuar. Në vendin tonë janë aktualisht 682 persona aktivë me COVID19, kryesisht në Tiranë, Shkodër, Krujë. Gjatë 24 orëve të fundit janë kryer 330 testime për të dyshuar të prekur me Covid19 nga të cilat janë konfirmuar 50 raste pozitive (dje 66), kryesisht raste të reja si dhe kontakte të rasteve të konfirmuara më herët pozitive.

Lajmi i mirë është se 24 orët e fundit janë shëruar 28 qytetarë, duke e çuar në 1114 numrin e të shëruarve që nga fillimi i epidemisë. Shpërndarja gjeografike e të identifikuarve pozitivë në 24 orët e fundit është si vijon: 17 raste në Tiranë, 6 në Krujë, 5 në Lezhë, nga 4 raste në Shkodër, Durrës, Fier, 3 në Korçë, 2 raste në Vlorë dhe Elbasan dhe nga 1 rast përkatësisht në Kurbin, Mirditë dhe Sarandë,

Ministria e Shëndetësisë dhe Mbrojtjes Sociale u drejtohet gjithë qytetarëve dhe bizneseve të jenë të kujdesshëm në zbatimin e protokolleve të sigurisë. "Inspektorati dhe Task Forca në terren vijojnë kontrollet intensive në subjekte, por nevojitet bashkëpunimi i bizneseve dhe qytetarëve për të respektuar rregullat, për të kufizuar përhapjen e COVID19".

Gjithashtu sipas ministrisë "është shumë e rëndësishme që jo vetëm personat e konfirmuar pozitive me shenja të lehta ose asimptomatikë, por edhe ata qytetarë që kanë dyshime se janë të prekur ose janë në pritje të përgjigjes së testit, duhet të qëndrojnë të izoluar në shtëpi, pasi janë burim për përhapjen e infeksionit.

Ju lutemi respektoni rregullat. E vetmja mënyrë për të ndaluar përhapjen e infeksionit është duke ruajtur distancën fizike prej 1.5 metër nga njëri tjetri, duke ruajtur higjienën personale dhe duke larë duart vazhdimisht, mbani maskat kudo ku ambienti është i mbyllur, bizneset dhe institucionet të respektojnë protokollet e përcaktuara.

Kujtojmë edhe një herë se çdo rast i identifikuar pozitiv, duhet të vetëizolohet dhe se shkelja e rregullave nga kushdo do të konsiderohet rrezik për jetën dhe shëndetin e të tjerëve. Ministria e Shëndetësisë po bashkëpunon ngushtësisht me Policinë e Shtetit për të mos lejuar asnjë person pozitiv që të thyejë rregullin duke dalë nga karantina, deri në shërimin e plotë.  Qytetarët duhet të shmangin grumbullimet masive pasi janë burim infeksioni, të evitojnë ceremonitë mortore dhe vizitat tek të afërmit për çdo lloj arsye.

Familjarët e pacientëve në spitale të shmangin sa më shumë vizitat, të moshuarit kur është e mundur të shmangin kontaktet në qendrat shëndetësore, por të kontaktojnë me mjekun e familjes për barnat me rimbursim. Kontaktoni me mjekun e familjes ose telefononi Urgjencën Kombëtare në numrin 127 nëse dyshoni se ju apo një i afërmi juaj është i prekur nga Covid19" mbyllet apeli i shëndetësisë.

COVID-19 – Statistika (19 Qershor 2020)
Testime totale                         22806

Raste pozitive                          1838

Raste të shëruara                    1114

Raste Aktive                             682

Humbje jete                              42 (Qarku Tiranë 23, Durrës 8, Fier 4, Vlorë 1, Shkodër 5, Kukës 1)

Shpërndarja gjeografike e rasteve aktive sipas qarqeve:

Tiranë                   317

Durrës                  140

Shkodër                112

Vlorë                      45

Fier                        28

Lezhë                    12

Elbasan                 11

Korçë                    10

Kukës                    5

Gjirokastër             1

Berat                      1

Rendit zhvillimet sipas orarit:

Të Fundit Të Parat

TAG:
• Koronavirus
• koronavirusi ne shqiperi
• bilanci i koronavirusit
• Avdi Vathi