Një i ri vlonjat ka humbur kontaktet nga Spanja, nga hetimet dyshohet për pistën e rrëmbimit. Artjol Ramaj rezulton i humbur që prej datës 2 mars të këtij viti. Të paktën deri mbrëmjen e kësaj dite ai foli me prindërit në Vlorë, ndërsa nuk shprehu asnjë shqetësim tek ata. Prej katër muajsh 29-vjeçari ishte zhvendosur në Girona të Barcelonës dhe punonte në shtëpinë e një shtetasi spanjoll. Deri më 2 mars kur pati kontaktet e fundit me familjarët i riu nuk kishte shfaqur asnjë shenjë të ndonjë konflikti të mundshëm me pronarin 51-vjeçar, por një ditë më pas kur telefoni i tij rezultoi i fikur familjarët u vunë në alarm. Ata nuk kishin asnjë pikë kontakti me të birin, pasi Artjoli ishte nisur i vetëm. Babai pret me urgjencë biletën dhe udhëton drejt Spanjës, ku mëson se djali ishte zhdukur dhe policia spanjolle kishte nisur hetimet. Dyshohet se pista kryesore për shqiptarin e humbur është ajo e rrëmbimit, ndërsa rasti është ende në hetim. Ndërkaq policia ka marrë në pyetje pronarin spanjoll, në makinën e të cilit janë gjetur gjurmë të vlonjatit Artjol Ramaj, jorgani i tij, telefoni si dhe çanta me sende personale e të riut. 51-vjeçari ka dëshmuar në polici se mes tyre ka ndodhur një konflikt, por pa dhënë sqarime të tjera. Edhe pse disa nga provat janë gjetur brenda makinës së këtij shtetasi spanjoll, ai mohon të ketë lidhje me zhdukjen e shqiptarit. Valentina Ramaj denoncon në emisionin ’Pa Gjurmë’ humbjen e të birit, ndërsa bën apel për ndihmë.