Një 73-vjeçar nga qyteti i Burrelit, Sadik Koka, ka humbur çdo kontakt me familjarët e tij që prej datës 25 prill 2025. Ai u largua nga banesa dhe nuk është kthyer më. Sipas familjarëve, Sadiku prej pesë vitesh vuante nga probleme të shëndetit mendor, dhe kohët e fundit kishte ndërprerë marrjen e medikamenteve, gjë që e kishte përkeqësuar gjendjen e tij. Familjarët tregojnë se Sadiku kishte zakon të udhëtonte shpesh drejt Tiranës, pasi shprehej se ndikohej nga fushatat elektorale, por gjithmonë ishte kthyer vetë në shtëpi. Kësaj here ndodhi ndryshe. Më 30 prill, një qytetar nga zona e Paskuqanit e gjeti pranë urës së Paskuqanit telefonin celular të Sadikut buzë lumit dhe iu përgjigj thirrjes së familjarëve. Ky detaj ngjalli frikë dhe shqetësim për më të keqen. Nga informacionet më të fundit, një punonjës policie që shërben pranë godinës së Parlamentit në Tiranë, ka pohuar se e ka parë Sadikun në atë zonë. Megjithatë, që prej asaj dite nuk është gjendur asnjë gjurmë e tij.