Historia e dhimbshme e një burri... që nga një sipërmarrës i fuqishëm përfundoi në rrugë. 67-vjeçari Bujar Qama, dikur pronar i një firme me 180 punëtorë, sot jeton në një garazh të rrënuar, i braktisur nga familja dhe i zhytur në varfëri. Historia e Bujarit e ka zanafillen në vitin 2013, pasi qeveria e asaj kohe vendosi t’i mbyllte biznesin e nxjerrjes së gurëve dekorativë nga Mali i Tomorrit , duke e konsideruar të paligjshëm pavarësisht se firma e tij ishte e licencuar. Për pasojë, Bujari humbi të ardhurat dhe nisi të përballej me një krizë financiare. Pasi gjatë viteve të punës, ai i dorëzonte të gjitha fitimet bashkëshortes së tij. Por me vone Bujari mësoi se e shoqja i kishte vendosur te ardhurat në bankë nën emrin e saj. Pas konflikteve bashkëshortja u pajis me urdhër mbrojtjeje, duke e nxjerrë jashtë shtëpisë kryefamiljarin dhe duke e lënë pa strehë. Bujari dhe ish-gruaja janë prindër të 3 fëmijëve, 2 djemve 31 dhe 27-vjeçarë e të një vajze e cila fatkeqësisht ndërroi jetë në vitin 2016, kur ishte 20 vjeçe për shkak të një sëmundje. Ajo që e bën edhe më prekëse këtë histori është se babai nuk ishte prezent në ceremoninë mortore të së bijës. Nga ana tjetër as dy djemtë e Bujarit nuk kanë asnjë kontakt me babain e tyre. I lënë në harresë, Bujar Qama vjen pasditen e sotme në “Pa Gjurmë” për të rrëfyer këtë histori ndërsa ka edhe një kërkesë.