Në kërkim të Sokol Tërvolit, 45-vjeçarit, i cili humbi kontaket në mënyrë misterioze nga Firence e Italisë. Historinë e tij e kemi risjellë disa herë në fokus me shpresën për të arritur në gjurmët e tij por fatkeqësisht ai ende rezulton në skedën e të humburve që prej vitit 2004. Ai jetonte në shtetin Italian me identitet të rremë. Dyshohet se ka perdorur dy pasaporta, Naser Shala si shtetas kosovar dhe Admir Asllani si shtetas shqiptar nga qyteti i Lushnjes. Sokoli është marrë me punë të jashtëligjshme në Firence dhe ka qenë nën shoqërinë e disa miqve të tij, po nga Gramshi. Almir Harruni, Aurel Zani i cili njihej me pseudonimin Leqe, si dhe një person tjetër me mbiemër Xhangolli që thërritej Nuçe në Itali, që fatkeqësisht ky i fundit u gjet i vdekur pas zhdukjes së Sokol Tervolit. Në maj të 2004 dy persona nga ky grup të rinjsh u zhdukën, Sokol Tervoli dhe Klodian Kaptelli por nuk dihet nëse dy zhdukjet kanë lidhje me njëra tjetrën. Për herë të fundit Sokol Tërvoli ka folur në telefon me të motrën të cilës i ka pohuar se do të kthehej në Shqipëri pas disa kohësh. Pas kësaj telefonate, familjarët nuk mundën t’ia dëgjonin më zërin të riut. Nga mesi i muajt maj, ai është parë po në Firence nga të afërm të familjes ndërsa gjendja e tij psikologjike nuk ishte fort e mirë. Pas zhdukjes së Sokolit, makina që kishte në pronësi u gjet në një provincë të Firences. Pas zhdukjes së dy të rinjve në shtator të po të njëjtit vit, gjendet i pajetë një prej pjestarëve të grupit, i riu me mbiemrin Xhangolli, ose “Nuçe” ashtu siç njihej në shtetin Italian. Mister ka mbetur fati i Sokol Tërvolit i cili që prej vitit 2004 nuk u bë më i gjallë për familjen. I gjatë 1.80cm, djali i familjes Tërvoli nga Gramshi kishte një tatuazh në krahun e majtë në formë dragoi dhe një të çarë në vetullën e majtë si shenjë dalluese.