Ky është i disati rast që trajtohet në emisionin ’Pa Gjurmë’, ku një tjetër e mitur ’mbahet peng’ nga familjarët e burrit. Anila Maliqi është një 17-vjeçare, e cila prej muajsh ndodhet në Gjermani. Ajo nuk lejohet nga familja e bashkëshortit të ketë kontakte as me nënën e saj, në Shqipëri, Lumturinë. Ky pretendim vjen nga familja e saj, të cilët kërkojnë ndihmë në emisionin ’Pa Gjurmë’ për të rilidhur kontaktet me të bijën. Vajza e vogël e familjes Maliqi të cilët jetojnë në Tiranë, u fejua në gusht të një viti më parë me shkuesi, me 20-vjeçarin Renaldo Rustemi, i cili prej 7 vitesh jeton në Gjermani me familjen e tij. Në fund të tetorit të 2020, nëna e Anilës vendos që ta dërgojë të bijën në Gjermani tek i fejuari, me shpresën për një të ardhme më të mirë. Lumturia qëndron tre ditë me vajzën, por me kthimin e saj në Shqipëri dhëndri i bën bllok menjëherë. Në përpjekje, për të folur me vajzën, ajo lidhet me vjehrrin e Anilës, Shkëlqimin i cili kërcënon me jetë të gjithë pjestarët e familjes Maliqi. Sa herë që nëna ka kërkuar të flasë me të bijën, nga ana tjetër e receptorit përgjigjet vjehrri, ndërsa dhëndri asnjëherë. 4 ditë më parë ka qenë kontakti i fundit me të bijën, ndërsa nuk ishte në gjendje të mirë. Për këtë arsye nëna ngre dyshimin e fortë, se e bija trafikohet nga vjehrri dhe se ky i fundit mund edhe të abuzojë mbi të miturën. Familja Maliqi kanë jetuar prej shumë vitesh në Greqi, vend në të cilin ka lindur edhe vajza e tyre e vogël Anila e cila ka dy motra dhe një vëlla më të madh. Në vitin 2017 ata u zhvendosën përfundimisht në Tiranë.
