Është larguar nga banesa më 1 maj dhe prej asaj dite familja nuk ka më asnjë kontakt me të. Bëhet fjalë Arben Malokun, një 60-vjeçar nga Durrësi, babai i tre fëmijëve… dy vajzave dhe një djali, i cili ka humbur çdo gjurmë në rrethana ende të paqarta.Në orën 6 të pasdites, ai i ka thënë familjes se do të dilte për të festuar Ditën e Punëtorëve. Punonte më herët pranë komunales së qytetit, dhe kolegët e tij për të fundit e kanë parë rreth orës 2 të mëngjesit në një lokal, ku po konsumonte disa gota alkooli.Në momentin e zhdukjes, ai ishte i veshur me një bluzë të bardhë, xhinse blu dhe një palë atlete Adidas. Në krahun e djathtë mbante një tatuazh me emrin e vëllait. Prej më shumë se tre javësh, familja është në ankth. Ata kërkojnë ndihmën e kujtdo që mund të ketë informacion për vendndodhjen e tij.