Emisionin "Pa gjurmë" me moderatore Odeta Dume mund ta ndiqni nga e hëna në të premte në orën 16:00 në ekranin e Report Tv Si shumë të rinj të cilët për një jetë më të mirë kanë marrë rrugët e emigrimit, por për arsye të ndryshme kanë humbur çdo kontakt me familjarët, është edhe rasti i Arjan Bulkut nga Kavaja. Prej një viti bënte jetën e emigrimit, ku punonte nëpër qytete të ndryshme të Italisë dhe Gjermanisë në ndërtim. Edhe pas shumë tentativave të së motrës për ta marrë tek shtëpia e saj në Itali, Arjani ishte i vendosur ta vazhdonte këtë jetë. I ndodhur në Itali i riu kishte shprehur dëshirën për t’u nisur drejt Gjermanisë sërish. Ishte data 16 korrik i vitit 2023 kur 23-vjeçari për herë të fundit telefonoi të motrën Marizën, të cilës i pohoi se kishte mbërritur shëndoshë e mirë në shtetin Gjerman me disa shokë, por që nga ai moment Arjani shkëputi çdo kontakt, për të mos u bërë më i gjallë. Sipas të motrës Arjani mashtrohej nga shokët, të cilët e detyronin të gënjente në familje dhe të kërkonte para, para të cilat ua merrnin shokët e tij. Së fundmi Arjani kishte marrë 1000 Euro borxh kushërirës së tij me pretekstin se ndodhej në kushte të vështira, por pak pasi kishte marrë paratë ai zhduket pa lënë gjurmë. Për këtë arsye familja hedh dyshime mbi shokët e tij, ndërsa të frikësuar për fatin e Arjanit kërkojnë ndihmën e emisionit ‘Pa Gjurmë’.