47-vjeçari Eduart Aliaj është i riu që sot është në skedën e të humburve, që prej vitit 2002. 22 vitet e tij të zhdukjes mbajnë ende në ankth zemrat e familjarëve, për fatin e të cilit nuk dihet ende më asgjë. Ishte një 25- vjeçar asokohe, kur u zhduk pa lënë gjurmë, nga Athina e Greqisë. Eduarti kishte emigruar edhe më herët drejt tokës Helene, për një jetë më të mirë, sikundër çdo shqiptar tjetër. Në vitin 1998 ishte pajisur me dokumenta greke dhe shpesh kthehej në Shqipëri, për t’u takuar me familjarë të tij. Viti 2000 ishte viti kur ai u martua me bashkëshorten e tij Eglantina, me të cilën kanë edhe një djalë, i cili ende dhe sot është në kërkim të babait, të cilin nuk e pa më që kur ishte 2 vjeç. Familja Aliaj, në atë kohë një familje e re, e kompletuar vazhdonte jetën normalisht në qytetin e vogël të Ballshit në Mallakastër. Eduarti vijonte të bënte jetën si emigrant në Greqi, për të siguruar të ardhura të tjera për familjen e tij të re të sapo ndërtuar. Në shtetin fqinj, ai punonte në firma të ndryshme ndërtimi.