Në studion e emisionit investigativ "Pa Gjurmë", sot kemi një histori të dhimbshme, atë të Besnik Beshirit, 46 vjeç, nga Berati, i cili prej 7 vitesh është i divorcuar nga bashkëshortja e tij, Lorena Çela, e cila jeton aktualisht në Greqi. Divorci mes tyre ndodhi për shkak të tradhtisë bashkëshortore, të cilën e zbuloi i vëllai i Besnikut. Sipas rrëfimit të tij, ai e ka gjetur kunatën në banesë me të dashurin dhe menjëherë ka lajmëruar Besnikun, i cili në atë kohë punonte në Greqi. I tronditur nga kjo ngjarje, ai u kthye menjëherë në Shqipëri dhe kërkoi divorcin. Gjykata i dha Besnikut kujdestarinë e djalit të tyre, i cili në atë kohë ishte vetëm 3 vjeç. Ndërkohë, ish-bashkëshortja u detyrua nga gjykata të paguante 50 mijë lekë si detyrim ushqimor për djalin. Por, sipas Besnikut, Lorena nuk ka paguar asnjëherë këtë detyrim, duke e lënë të birin pa mbështetje financiare nga nëna. Sot, Besniku ndodhet në studion e "Pa Gjurmë", për të kërkuar ndihmë dhe për të denoncuar këtë padrejtësi. Ai kërkon që ish-bashkëshortja të mbajë përgjegjësinë e saj ligjore ndaj fëmijës dhe që djali i tij të marrë të drejtën që i takon.