17 vite nga humbja e Artur Carës nga Elbasani dëshmia e parë që mbërriti në emisionin ’Pa Gjurmë’ në Report TV një vit më parë hodhi dritë mbi mënyrën sesi u zhduk mesditën e 7 korrikut të vitit 2004, Arturi asokohe një 9-vjecar. Dëshmitari pretendon se djali është kontaktuar nga një burrë i bëshëm me mustaqe, i veshur me uniformë policie. Ky përshkrim vjen nga i pari dëshmitar okular, i cili e njihte Arturin, ndërsa takoheshin bashkë në të njëjtin treg të qytetit të Elbasanit. Por pa kaluar pak muaj nga kjo dëshmi, një tjetër dëshmi zbulon detaje të reja, ku në fokus mbetet sërish momenti i fundit kur u pa Arturi. Një zotëri pretendon se ndërsa ka qenë duke konsumuar kafe në një lokal në Elbasan e ka parë disa herë të bisedonte me dy persona. Mendohet se kjo përkon me ditën kur Arturi humbi gjurmët. Dëshmitari që dha këtë informacion ka dëgjuar bisedën mes dy të rinjve, të cilët e ka thërritur disa herë 9-vjecarin në tavolinë.Arturi humbi gjurmët nga tregu i qytetit, ndërsa shiste qese plastike bashkë me të vëllanë e tij më të madh Blerimin. Të dy dolën në punë si çdo ditë, por Arturi nuk u takua me të vëllanë ne vendi ku kishin lënë takimin e drekës. Dyshimi i familjarëve mbetet ajo e pistës së rrëmbimit. Me flokë të zeza dhe sy të zinj, me një djegje në faqen e djathtë, një nishan në anën e majtë të shpatullës dhe një tjetër në anën e majtë të vetullës, janë këto shenjat dalluese të Arturit i cili sot është 25 vjeç. As fotot e tij të shpërndara në të gjitha pikat kufitare të vendit, as hetimet e policisë dhe prokurorisë së Elbasanit apo shpallja si i humbur dhe kërkimi nga Interpoli nuk kanë gjurmë. Deri në vitin 2013, dosja e Artur Carës mbeti në hije për policinë, derisa vetë babai i tij Jakupi bëri një deklaratë publike ku shprehte dyshime për pedofilin e sapo arrestuarit Ardian Prrenjasi, se mund të kishte qenë ai personi, që kishte rrëmbyer djalin. Prrenjasi ishte kapur nga policia sepse dyshohej si abuzues seksual dhe vrasësi i një fëmije tjetër. Këto dyshime nuk u arritën të provoheshin sepse Prrenjasi nuk e pranoi të kishte lidhje më zhdukjen e Arturit megjithëse rezultoi se ai njihej me familjen Carja.
