Një 39-vjeçare nga Pogradeci, nënë e dy vajzave hodhi akuza të forta në drejtim të familjarëve të bashkëshortit të saj të ndjerë. Basire Shuli pretendon se është dëbuar nga shtëpia dy muaj më parë nga familjarët e bashkëshortit, pasi këta të fundit e fajësojnë për vdekjen e tij. Pretendimet e nuses shkojnë edhe më tej, kur ajo thotë së është dhunuar dhe kërcënuar nga kunata Florie Shuli. Nga studio e emisionit ’Pa Gjurmë’ ajo rrëfen sesi lindën konfliktet dhe pse sot ajo u detyrua të lë banesën, ku kishte jetuar për 10 vite me radhë. 39-vjeçarja Basire Shuli nga Mokra e Pogradecit vinte nga një martesë e vështirë, nga e cila ka dy fëmijë të rritur, të cilët jetojnë me të atin. Ajo vendosi të divorcohej dhe të kthehej në shtëpinë e prindërve, aty ku u njoh me Eqeremin, i cili gjithashtu vinte ngë një tjetër martesë nga e cila ishte baba i dy fëmijëve që jetojnë me nënën e tyre. Me histori thuajse të ngjashme, fati bashkoi çiftin nga Pogradeci, kur burri nuk hezitoi t’i kërkonte dorën gruas që do të ishte bashkëshortja e tij e ardhshme. Prindër të dy vajzave 4 dhe 9 vjeçare dhe pse mes tyre kishte harmoni, ajo që trazonte shpesh marrëdhënien ishin konfliktet e nuses me familjarët e burrit. Ata nuk e kishin pranuar që prej fillimit këtë martesë dhe sherret vazhduan kur Eqeremi u diagnostikua me një sëmundje të rëndë nga e cila nuk gjeti dot shpëtim. Pas fatkeqësisë në familje, Basirja pretendon se vjehrra e dëboi nën presionin e kërcënimeve dhe dhunës së kunatës. Ajo iu drejtua emisionit ’Pa Gjurmë’, për ndihmë ku në minutat e fundit të programit pala tjetër reagoi. E irituar motra e të ndjerit Florie Shuli mohoi akuzat duke kërkuar përballjen, por pak momente para fillimit të transmetimit live ajo nuk u paraqit në program, madje bllokoi çdo kontakt me stafin e ’Pa Gjurmë’. Edhe pse kërkoi vetë t’i përgjigjej akuzave të ngrituar në studio Floria zgjodhi të ndërpriste kontaktet.