Drafti me 14 pika/ Meta 'i heq' kompetencat Kuvendit: Këshill Politik për çdo ndryshim në reformën në drejtësi

Report Tv ka zbardhur draftin që presidenti Meta i ka paraqitur opozitës jashtëparlamentare gjatë takimit të djeshëm. Në draft janë 14 pika, ku ajo që vihet re është se Meta kërkon ngritjen e një Këshilli Politik, që do të vendos për ndryshimet ligjore e Kushtetuese në Reformën në Drejtësi. Me Këshillin Politik njësoj si ai i ngritur për reformën zgjedhore, Presidenti Meta kërkon të njëjtën gjë edhe për Drejtësinë duke i hequr të drejtat për të vendosur parlamenti dhe gjithçka të vendoset në një tryezë politike mes partive.

Ky fakt duket se është fshehur gjatë takimit që ai zhvilloi me ambasadorët e vendeve të BE duke u përqendruar vetëm tek Reforma Zgjedhore dhe kjo ka nxitur reagimin e ashpër të ambasadores amerikane Yuri Kim dhe atij të BE, Luigi Soreca, duke u shprehur se  "fjalët për një marrëveshje prapa krahëve për të vrarë reformën në drejtësi në Shqipëri të mos jenë të vërteta dhe se reforma duhet të vazhdojë para dhe të zbatohet me efikasitet".

Reforma në Drejtësi është një investim i drejtpërdrejtë i SHBA dhe kërkesat e Presidentit Meta për të ndërhyrë politikisht në këtë reformë solli reagimin e fortë të ambasadores Yuri Kim duke e cilësuar sabotim dhe se nuk do të lejohet duke i dërguar një mesazh të qartë dhe direkt Presidentit dhe të gjithë atyre që janë pjesë e planit të tij. Të njëjtin mesazh Yuri Kim dha dhe sot para takimit me KPA, duke u shprehur hapur se s'ka më pazare dhe lojëra me drejtësinë dhe zgjedhoren.

Pas reagimit të fortë të ambasadës së SHBA, i menjëhershëm ishte dhe ai i kryeministrit Rama duke e mbështetur atë dhe akuzuar Metën "se djajtë janë në tokë", ndërsa kryedemokrati Basha tha se ndryshimet nuk duhet të ndodhin në parlament pasi është ilegjitim, por nuk u shpreh kundër këtyre ndryshimeve që kërkoi presidenti që të zhvilloheshin jashtë tij.

Gjithashtu Meta kërkon që mazhoranca dhe opozita (parlamentare dhe jo-parlamentare) duhet të përfundojnë me vendosmëri Reformën Zgjedhore, sipas rekomandimeve të OSBE/ODIHR,  duke lënë të kuptohet se nuk është pro ndryshimit të sistemi zgjedhor, të kërkuar me forcë nga opozita parlamentare, e cila ka thënë se do të vendos dhe veton për këtë çështje.

Në pikat e përmendura është edhe heqja e iniciativës së parlamentit për të ndryshuar formatin e betimit të anëtarëve të Gjykatës Kushtetuese pas precedentit të krijuar me Arta Vorpsin, e cila u refuzuar nga Meta të bënte besimin dhe iu drejtua një noteri. Kjo solli një përplasje të fortë politike mes qeverisë dhe Presidencës, duke shkaktuar edhe një tubim më 2 mars, ku Ilir Meta kërcënoi se nëse parlamenti nuk tërhiqet nga kjo nisëm do ta shpërndajë atë.

Disa pika i ishin përkushtuar edhe Këshilli i Emërimeve në Drejtësi duke kërkuar largimin e Ardian Dvoranit me emërimin e tre gjykatësve të Gjykatës së Lartë sipas radhës Presidenti - Parlamenti - Presidenti. Pjesë e veprimtarisë së këtij këshilli duhet të jetë edhe Avokati i Popullit.

Hapa pas deputetët e Kuvendit duhet të hedhin edhe për Paketën Antishpifje dhe nga çdo nismë e ngjashme ligjore në të ardhmen.

14 pikat e platformës të paraqitur nga Presidenti  Ilir Meta dje:

1- Mazhoranca dhe opozita (parlamentare dhe jo-parlamentare) duhet të përfundojnë me vendosmëri Reformën Zgjedhore, sipas rekomandimeve të OSBE/ODIHR dhe konkluzioneve të Këshillit Europian për Çështjet e Përgjithshme.

2- Këshilli i Emërimeve në Drejtësi duhet të vazhdojë funksionimin, duke përfshirë ndryshimin e akteve nënligjore të tij, në përputhje me rekomandimet e Komisionit të Venecias në draft-opinionin e 6 marsit. Për tre vendet e lira (2 nga Presidenti dhe 1 nga Parlamenti), KED duhet të paraqesë listat e kandidatëve për secilin institucion sipas sekuencës kushtetuese: Presidenti - Parlamenti - Presidenti

3- Këshilli i Emërimeve në Drejtësi duhet të pajtohet me pjesëmarrjen e Avokatit të Popullit në të gjithë veprimtarinë e tij dhe diskutimet, në përputhje me Kushtetutën dhe Ligjin.

4- Mandati i Kryetarit aktual të Këshillit të Emërimeve në Drejtësi përfundon me emërimin e tre gjykatësve të Gjykatës së Lartë. Kryetari aktual i KED humbet menjëherë të gjitha të drejtat për të vazhduar ushtrimin e mandatit të tij, me vonesë të gjatë, si anëtar i Gjykatës së Lartë, dhe për pasojë si Kryetar i KED.

5- Këshilli i emërimeve në drejtësi vazhdon të funksionojë sipas ligjit, kryesohet nga Nënkryetari.

6- Parlamenti Shqiptar merret menjëherë me çdo boshllëk ligjor, në mënyrë që Presidenti dhe Parlamenti të plotësojnë vendet e mbetura bosh në KED brenda 1 viti kalendarik.

7- Parlamenti Shqiptar tërhiqet nga çdo iniciativë ligjore që ndryshon formatin dhe procedurën e betimit në detyrë të anëtarëve të Gjykatës Kushtetuese dhe anëtarët e tjerë të lartë të sistemit gjyqësor.

8- Parlamenti Shqiptar tërhiqet nga "Paketa Anti-shpifje" dhe nga çdo nismë e ngjashme ligjore në të ardhmen.

9- Çdo ndryshim ligjor ose kushtetues që lidhet me reforma gjyqësore duhet të bëhet vetëm përmes konsensusit unanim të Këshillit Politik.

10- Në kuadrin e Këshillit Politik, partitë bien dakord brenda qershorit për të emëruar Shef-Negociator për anëtarësimin në BE, një ekspert të nivelit të lartë, integriteti, besueshmëria dhe profesionalizmi i të cilit është i pajtueshëm nga të gjitha palët.

11- Të gjithë gjyqtarët e Gjykatës së Lartë emërohen në përputhje me dispozitat kushtetuese dhe ligjore, dhe sa më shpejt të jetë e mundur.

12- Këshilli i Lartë Gjyqësor, Këshilli i Lartë i Prokurorisë miraton menjëherë hartën e re gjyqësore për rishpërndarjen e burimeve njerëzore brenda sistemit të Gjykatës së Apelit dhe Gjykatat e Shkallës së Parë, dhe vazhdohet me plotësimin e vendeve bosh të krijuara nga dorëheqjet ose vettingu.

13- Këshilli i Lartë Gjyqësor duhet të përcaktojë parësore mbingarkesën e Gjykatës Administrative të Apelit, dhe të propozojë masat e nevojshme që lejon një proces të rregullt brenda afatit kohor (1 muaj) në këtë Gjykatë.

14- Parlamenti Shqiptar duhet të shqyrtojë pa interes politik, kandidatët e propozuar nga Presidenti i Republikës për Kryetarin e Kontrollit të Lartë të Shtetit.

Drafti me 14 pika në gjuhën angleze

(Kliko këtu për të lexuar draftin në gjuhën shqipe)

/r.k./Shqiptarja.com

TAG:
• Ilir Meta
• reforma ne drejtesi
• Yuri Kim