Në ditën e 14 të 'luftës' me flakët, zjarri vijon të jetë ende aktiv në Karaburun. Mëngjesin e sotëm, situata në Karaburun ishte e qetë, por përkeqësimi  motit solli dhe një përkeqësim të flakëve, ku era e fortë riaktivizoi një vatër në zonën e quajtur Gropa e Pirit dhe po digjen pyje me bredha. Për neutralizimin e flakëve ka nisur edhe ndërhyrja nga ajri.

Duket se situata e zjarreve në Gjirokastër është qetësuar. Tre vatra janë riaktivizuar mëngjesin e sotëm në Saraqinishte, Krinë dhe Arshi Lengo por ndërhyrja e menjëhershme e PMNZSH, e forcave ushtarake dhe e banoreve të zonës, ka rikthyer normalitetin

Katër persona janë arrestuar në qytetin e Gjirokastrës pasi janë konstatuar duke kultivuar lëndë narkotike.

Në një peisazh tërësisht të shkrumbuar nga zjarret e një dite më parë , “Asim Zeneli”, një fshat i vogël rreth 5 kilometra larg nga Gjirokastra, duket se ka pësuar dëmtimet më të mëdha. Banorët u gjetën të papërgatitur teksa zjarri i një dite më parë, në pak minuta, i favorizuar dhe nga era iu afrua shtëpive plot gjelbërim duke rrezikuar jetët e shumë banorëve.

Janë vënë nën kontroll flakët në Fushë-Arrës, duke larguar rrezikun për banesat. Ndërkohë 13 vatra zjarri janë aktive në vend,por fatmirësisht nuk ka rrezik për zonat e banuara. 

Duket se normalizimi i situatës së krijuar nga zjarret në vend nuk do të ndihmohet nga moti, ku temperaturat e larta që pritet të jenë prezente ditën e nesërme, rrisin edhe më tej kërcënimet.

Nga Gjirokastra atje ku u shënua dhe viktima e parë nga zjarret, Kreu u Emergjencave Civile Haki Çako tha se banorët e 3 fshatrave që u evakkuan dje janë rikthyer në shtëpitë e tyre tani që situate është vënë në kontroll. Megjithatë Çako paralajmëroi se vatrat mund të rindizen herë pas here për shkak edhe të temperaturave.

Nga Dukati i Vlorës ministri i Mbrojtjes Niko Peleshi ka folur për situatën e zjarreve. Ministri tha se aktualisht po punojnë 3 helikopterë për neutralizimin e flakëve në zonat problematike në Vlorë, ndërsa pritet të vijë një ekip i specializuar nga Holanda

Pas ngjarjes tronditëse në fshatin Asim Zeneli, ku humbi jetën 64-vjeçari Andrea Haxhiaj, ka folur për Report Tv shoku i të ndjerit. Pranë banesës së viktimës, i afërmi u shpreh se kjo është një fatkeqësi e madhe për familjen. Sipas tij, pasi flakët u futën brenda në fshat, nuk kishin zjarrfikëse në dispozicion gjë që solli edhe humbjen e jetës së Haxhiajt.

Qindra hektarë tokë janë shkrumbuar brenda 24 orëve të fundit në njësitë administrative Antigone dhe Lunxhëri të bashkisë së Gjirokastrës. Ndonëse paradite situata u normalizua në Gjirokastër ku u shuan të gjitha vatrat e zjarrit,  nuk ka kaluar shumë kohë në qetësi pasi është riaktivizuar sërish një tjetër vatër, ajo në zonën e fshatit ‘Arshi Lengo’, ku humbi jetën dje 64-vjeçari Andrea Haxhiaj. Falë angazhimit të trupave të FA zjarri është vënë në kontroll