Sëmundja celiake është një çrregullim autoimun kompleks që prek një numër gjithnjë e më të madh njerëzish në mbarë botën, shpesh pa u diagnostikuar për një kohë të gjatë. Ajo shfaqet kur sistemi imunitar reagon në mënyrë të gabuar ndaj glutenit, një proteinë që gjendet kryesisht në grurë, elb dhe thekër duke shkaktuar inflamacion dhe dëmtim të zorrës së hollë. Ky dëmtim, nëse përsëritet vazhdimisht, mund të çojë në probleme serioze me përthithjen e lëndëve ushqyese, duke ndikuar drejtpërdrejt në shëndetin e përgjithshëm të organizmit. Megjithatë, shpesh lind konfuzioni midis sëmundjes celiake dhe një intolerance të thjeshtë ndaj glutenit. Ndërsa simptomat mund të duken të ngjashme, mekanizmat dhe pasojat në organizëm janë të ndryshme dhe kërkojnë qasje të ndryshme në diagnostikim dhe trajtim. Për më tepër, ndikimi i kësaj sëmundjeje nuk kufizohet vetëm në traktin tretës, por mund të prekë edhe organe të tjera dhe sisteme të trupit. Në këtë diskutim në “Rreze Dielli” do të trajtojmë në mënyrë të detajuar çfarë është sëmundja celiake, si dallohet ajo nga intoleranca ndaj glutenit, çfarë dëmesh shkakton në zorrën e hollë dhe si diagnostikohet saktë. Gjithashtu, do të ndalemi te burimet e “fshehura” të glutenit në ushqime, lista e produkteve që e përmbajnë atë, si dhe rëndësia e një diete të kujdesshme pa gluten. Në bashkëpunim me nutricionistin Altin Joka, do të shqyrtojmë simptomat kryesore, faktorët e rrezikut dhe mënyrat më efektive për menaxhimin e kësaj gjendjeje.