Historia e trishtë e një nëne e cila në momentet më të vështira të jetës së saj, është braktisur edhe nga i shoqi. Hekurane Gërmenji është një 26 vjeçare, e cila pasi u njoh me Teki Halilaj, të dy vendosën ta kurorëzonin dashurinë e tyre në martesë 5 vite më parë. Vitin e parë gjithcka shkonte mirë por pasi mbeti shtatzënë, çdo gjë filloi të ndryshonte. Hekuranja, ishte 4 muajshe shtatzënë, kur bashkëshorti bie në burg dhe e reja mbetet e vetme. Kur djali ishte 3 muajsh ai doli nga burgu, ndërsa nuk ishte prezent në ditën më të bukur, ditën që foshnja erdhi në jetë. Teki Halilaj vazhdimisht kryente dënime për shkak të vjedhjeve që bënte dhe jetës jo të rregullt. Edhe pasi në jetë erdhi djali i dytë sërish Tekiu nuk ndryshoi. Si të mos mjaftonte kjo më 5 mars Hekuranja u diagnostikua me sëmundjen e rëndë kancer, ndërsa që prej asaj kohe ndjek vazhdimisht mjekimet. 4 muaj më parë Teki Halilaj emigroi drejt Zvicrës për të punuar duke lënë të vetme nënën e sëmurë me dy fëmijët e mitur 3 vjeç dhe 17 muajsh. Një muaj më pas ai bie në burg për shkak të një vjedhje ku për 3 muaj qëndroi pas hekurave pa kontaktuar me bashkëshorten. Më datë 28 tetor ai telefonon Hekuranen të cilës i pohon se sapo kishte dalë nga burgu dhe se kishte dalë i pafajshëm. Gjithashtu ai i pohon se do të qëndronte dhe 5 muaj për të punuar dhe se do të kthehej në shtëpi. Por që prej asaj date ai nuk e ka telefonuar më të shoqen, duke mos u interesuar as për shëndetin e saj e as për dy djemtë. Sot Hekuranja jeton tek vëllai i saj, i cili është i vetmi që kujdeset për të.