Vezët janë prej kohësh pjesë e tryezës sonë të përditshme dhe një ndër ushqimet më të diskutuara në botën e ushqyerjes. Dikur ato konsideroheshin si një rrezik për shëndetin e zemrës për shkak të përmbajtjes së kolesterolit, ndërsa sot shumë specialistë i rendisin mes “superushqimeve” falë vlerave të tyre të larta ushqyese. Kjo ka krijuar shpesh konfuzion: a duhet t’i konsumojmë vezët çdo ditë apo të tregojmë kujdes? Në këtë bisedë në “Rreze Dielli” do të shqyrtojmë përfitimet shëndetësore të vezëve, rolin e tyre në një dietë të balancuar dhe sa është sasia e rekomanduar për kategori të ndryshme si të rriturit, fëmijët dhe të moshuarit. Gjithashtu, do të ndalemi te pyetje të zakonshme si: cila pjesë është më e shëndetshme, e bardha apo e verdha? Cila është mënyra më e mirë e gatimit për të ruajtur vlerat ushqyese? Dhe mbi të gjitha, a ndikojnë vezët realisht në rritjen e kolesterolit apo kjo është një keqkuptim? Për t’u dhënë përgjigje të sakta dhe të bazuara në shkencë këtyre pyetjeve, do të flasim me nutricionistin Altin Joka, ekspert i mjekësisë holistike, i cili do të na ndihmojë të kuptojmë më qartë vendin që duhet të zënë vezët në regjimin tonë ushqimor.