#pagjurme #odetadume #reportTV Emisionin "Pa gjurmë" me moderatore Odeta Dume mund ta ndiqni nga e hëna në të premte në orën 16:00 në ekranin e Report Tv Një djalë nga Lezha e rrëmbeu, për ta trafikuar drejt Italisë! Një vit foli me familjen nga Milano, më pas humbi gjurmët! Kjo është saga e zhdukjes së vajzës nga Fieri, për të cilën familja është ende në kërkim. Ditën që u largua në shtator të vitit 1997 nga Fieri, u pa nga kushëriri i saj të hipte në një makinë me xhama të zinj. Ajo u largua në një vit trazirash për shqiptarët, por nuk dihet ende cfarë ka ndodhur me fatin e 21-vjeçares asokohe Etleva Parangoni. A pati ajo një fund tragjik nga përtej Adriatikut ? Një histori që për familjarët ngre ende sot pikëpyetje të mëdha. Një natë para se të zhdukej nga banesa e hallës, i komunikoi së motrës Lefterisë, se do të shkonte në shtëpinë e prindërve për ta pastruar, pasi nëna gjendej në Greqi dhe i ati i shtruar në spital. Të nesërmen i la në gjumë të gjithë dhe iku. Një javë më pas për habi të familjarëve Etleva merr në telefon nga Italia. U thotë se ndodhej në Milano, ku edhe kishte nisur punë. Për afro një vit me radhë folën disa herë në telefon. Edhe familja e merrte në numrin fiks, në shtëpinë ku ishte akomoduar dhe ku jetonte me një shoqe me iniciale M.D. Por cili do të ishte më pas fati i vajzës nga Fieri ? Fillimisht familja njoftohet me telefon se Etleva ishte kthyer në Shqipëri dhe se ndodhej në qytetin e Elbasanit. Pas kësaj telefonate vëllai i vajzës me të cilën Etleva ndante dhomën në Itali, u paraqit në familjen Parangoni dhe u tha familjarëve se Etleva kishte bërë një ndërhyrje në këmbë, por ishte shëndosh e mirë. Kur nëna dhe babai udhëtuan në Elbasan, në lagjen 5 Maji ata u takuan me të afërm të M.D., të cilët pohuan se Etleva nuk kishte qenë aty. Por dëshmia e fqinjes së familjes nga Elbasani, zbuloi se Etleva kishte qenë aty dhe se ishte mbajtur e izoluar për pak kohë, kur më pas kishte udhëtuar sërish drejt Italisë. Kishin kaluar afro dy vite që për Etlevën nuk kishte më asnjë informacion. Babai i saj ndërroi jetë pak kohë më pas, ndërsa ende edhe sot nëna beson se e bija është gjallë. Margarita Parangoni ka bërë thirrje në program për këdo ka informacion. Kjo plagë ka mbetur ende e hapur në familjen Parangoni.
