Ndarja nga bashkëshortja 15 vite më parë e ndau për së gjalli edhe nga dy fëmijët e tij. Ferdinand Cani është 59-vjeçari nga Vlora i cili vjen në studion e emisionit ’Pa Gjurmë’, jo vetëm për të rrëfyer këtë histori të jetës, por për t’ju drejtuar me një mesazh pendese dy djemve të rritur. Me njërin prej tyre kontaktet e humbi kur vendosi të ndahej nga bashkëshortja, ndërsa me të voglin djalë që jeton në Francë ka ende një marrëdhënie të ndërlikuar. Ata kanë folur së fundmi në rrjetet sociale, por ende nuk kanë mundur të dakortësojnë një marrëdhënie normale si bab e bir. I ati nuk di nëse djali i tij i madh jeton ende në qytetin e Vlorës pasi në 14 vite çuditërisht rrugët nuk u janë kryqëzuar. Ata s’kanë mundur dot t’i shuajnë mëritë mes njëri-tjetrit duke mos guxuar as të përballen dhe për këtë 59-vjeçari fajëson bashkëshorten e tij. Ferdinand pretendon se konflikti me këtë të fundit erdhi si pasojë marrjes së një kredie nga ish-gruaja në emrin e tij, në vitin 2007, gjë për të cilën e pranon se ushtroi edhe dhunë mbi të. Dhunë për të cilën kreu edhe 8 muaj burg. Me ngjarjet e së shkuarës që i rëndojnë mbi shpinë, sot ky 59-vjeçar ndjehet I braktisur. Ai ka nevojë të rekuperojë diçka nga e gjitha kjo që ka ndodhur me familjen e tij. Kërkon të rilidh kontaktet me djemtë, për të cilët ndjen pendesë që s’ka mundur dot t’u gjendet pranë teksa ata u rritën pa figurën atërore.