Pas një aksidenti në Greqi, 25-vjeçari Selim Mahmutaj pësoi dëmtime të rënda në kokë, të cilat e lanë me pasoja. Ishte viti 2016 kur duke udhëtuar me motor, të riun e përplas një makinë dhe pas këtij aksidenti ai dërgohet me urgjencë në spital pa shënja jete. Familjarët u lajmëruan se Selimi kishte ndërruar jetë, por pasi motra shkoi për ta parë, ai i shtrëngoi dorën kësaj të fundit ndërsa për to ky ishte një moment lumturie. Pas disa ditësh në gjendje kome, ai iu nënshtrua një operacioni nga ku doli nga ajo gjëndje. Për të gjetur të drejtën e Selim Mahmutajt familja mori një avokat, i cili i përfaqësoi në seancat gjyqësore, por sipas tyre ky i fundit i ka mashtruar. Ai iu ka pohuar se e kanë humbur gjyqin, por asnjëherë nuk iu ka paraqitur ndonjë vendim. Pas shumë përpjekjesh me anë të terapisë, djali u ngrit në këmbë por sot ai nuk mundet të flasë. Nëna e tij Aishe Mahmutaj kërkon nga emisioni ‘’Pa Gjurmë’’ të gjejë të vërtetën e djalit.