Kronikë

Para datës 31 gusht do të hapet loti i 5 i Unazës së Re në Tiranë. Kështu ka deklaruar ministrja e infrastrukturës Belinda Balluku teksa ka inspektuar punimet në Unazën e Madhe të Tiranës, në lotin dy, segmenti Mbikalimi i Pallatit me Shigjeta - Sheshi Shqiponja.

Diell dhe temperatura relativisht të larta do të karakterizojnë kushtet e motit në vendin tonë duke filluar nga orët e para të ditës, sipas MeteoAlb. Këto kushte atmosferike mbeten deri orët e vona të pasdites kur në veri-verilindje dhe juglindor shfaqen vranësira të lehta. Edhe orët e natës mbeten me mot të kthjellët.

Situata e zjarreve vijon të mbetet kritike në Vlorë. Edhe këtë të hënë është nën flakë Karaburuni, një prej vatrave më të mëdha në këtë qark aktive prej 7 ditësh. Ndërhyrja nga ajri për të dytën ditë radhazi nuk ka mundur që ta shuajë këtë vatër të rrezikshme që vijon të mbetet ende problematike.

Pas disa orësh janë vënë nën kontroll 2 vatrat e fuqishme të zjarrit në zonën e Mamurrasit, që rrezikuan 5 banesa. Lajmin e ka bërë me dije kryetarja e Bashkisë Kurbin Majlinda Cara e cila thotë se ndonëse vatrat janë vënë nën kontroll kanë lënë pas dëme të mëdha.

Pas 10 ditësh në flakë, këto janë pamjet që ofrohen nga lartësia e Gadishullit të Karaburunit.

Ndërhyrja nga ajri me helikopter ditën e sotme ka sjellë një përmirësim të situatës së zjarreve në zonën e Dukatit dhe atë të Karaburunit, dy nga vatrat më të vështira në Vlorë që janë aktive prej më shumë se 10 ditësh, ndërsa nuk ka asnjë reagim për vonesën në ndërhyrje nga ajri dhe dëmet e shkaktuara. Helikopteri i ardhur pas remontit ka punuar gjatë ditës së sotme në të dyja vatrat atë të Dukatit dhe Karaburunit deri në orët e pasdites, ndërsa pritet që të rinis sërish punën nesër.

Në vendin tonë vijon të ketë një rritje të ndjeshme të rasteve të reja me COVID-19. Si rezultat i 2.568 testimeve, në 24 orët e fundit kanë rezultuar pozitivë 40 qytetarë, ndërsa asnjë person nuk ka ndërruar jetë.

Bukuritë shqiptare, deti dhe plazhet e Shqipërisë kanë rrëmbyer vëmendjen e medias prestigjiozes italiane, Corriere della Sera.

Kryeministri i Kosovës Albin Kurti ka reaguar për herë të parë për Open Balkan iniciativën e Shqipërisë, Maqedonisë së Veriut dhe Serbisë për treg të përbashkët dhe heqjen e kufijve. Kurti tha se Serbia fillimisht duhet të ballafaqohet me të kaluarën kriminale, pastaj të flasim për treg të përbashkët, ndërsa më shumë kjo nisëm i ngjan një Ballkani të hapur ndaj ndikimit rus e kinez.

Pushuesi nga Kavaja është hedhur në detin e Spillesë por ka dëmtuar qafën duke mbetur pa ndjenja. Në këtë moment ka ndërhyrë roja e plazhit, i cili shpëtoi të riun dhe pasi i ka dhënë ndihmën e parë, ka lajmëruar ambulancën për trajtim të specializuar.

Ekstradohet nga Gjermania një 30-vjeçar shqiptar i cli ishte shpallur në kërkim ndërkombëtar nga Interpol Tirana. Burime zyrtare bëjnë me dije se 30-vjeçari është identifikuar si Drini Valca, banues në Sarandë.

Një vendim i Bashkisë Sarandë  për ndryshimin e orarit të furnizimit të dyqaneve duke e kufizuar atë ka nxitur reagimin e bizneseve në zonë. Shoqata e Biznesit në Sarandë i ka dhënë ultimatum Bashkisë Sarandë se nëse nuk do të tërhiqen nga vendimi për kufizimin e orarit të furnizimit të dyqaneve të tyre do të përballen me protesta dhe bllokim rrugësh.

 Polica ka konstatuar një mjet luksoz të tipi 'Jaguar', i cili 'fluturonte' në rrugën e Kombit me shpejtësi 191 km/h. Për pasojë, drejtuesi i mjetit rezident në Angli është gjobitur me 40 mijë lekë gjobë. Ndërsa gjatë 24 orëve të fundit janë arrestuar 14 shoferë, janë gjobitur 2.019 drejtues mjetesh e janë pezulluar 56 patenta. 

Një16-vjeçar i cili drejtonte një mjeti tip 'Benz' është përfshirë ditën e sotme në një aksident rrugor në aksin Fier-Seman dhe ka përfunduar në kanal. 16-vjeçari ëhstë përplasur me mjetin tip 'Volkswagen' që drejtohej nga 61-vjeçari V.H. Si pasojë e aksidentit kanë mbetur të plagosur dy drejtuesit e mjeteve, por edhe 4 pasagjerët që udhëtonin në këto mjete.