Djegia e mandateve, Balla: Bojkoti i radhës për të bllokuar reformën në drejtësi

Kreu i grupit parlamentar të Partisë Socialiste Taulant Balla e ka cilësuar vendimin e opozitës për të djegur mandatet si bojkotin e tyre të radhës, në përpjekje për të bllokuar ngritjen e dy organeve të reja të reformës në drejtësi siç janë Byroja Kombëtare e Hetimit dhe SPAK.

Madje ai ka nënvizuar se reforma në drejtësi jo vetëm që nuk ndalet nga djegia e mandateve, por se të enjten mazhoranca do të votojë strukturat e KLGJ dhe KLP.

Sipas Ballës, vendimi i opozitës bie ndesh me atë që ndërkombëtarët presin nga faktori politik në vendin tonë, në kuadër të së ardhmes europiane. Për kreun e grupit socialist, e vetmja gjë që do të arrijnë PD dhe LSI me këtë vendim, është distancimi i mëtejshëm me elektoratin.

“Është e rëndësishme të bëhet e qartë për liderat e opozitës që nëse ata vazhdojnë të përbuzin Parlamentin dhe mjetet demokratike, e vetmja gjë që do të arrijnë është distancimin e mëtejshëm të elektoratit prej tyre. Kjo sjellje është e papranueshme nga partnerët tanë ndërkombëtarë, të cilët nuk mbështesin as metodat e dhunshme dhe as këtë lloj retorike. Debati politik duhet të ndodhë brenda institucioneve shtetërore, pikë së pari brenda Parlamentit. Asnjë parti politike në Shqipëri nuk ka të drejtë të dëmtojë perspektivën europiane të Shqipërisë. Mandatet e deputeteve përfaqësojnë vullnetin e popullit. Djegia e tyre do të thotë injorimi i këtij vullneti.” U shpreh Balla gjatë një takimi me strukturat e PS-së në Elbasan në kuadër të zgjedhjeve të ardhshme lokale.

Balla ka kërkuar nga socialistët që të përqendrohen tek zgjedhjet vendore. Sipas Ballës, konkurrenti kryesor i socialistëve në zgjedhje nuk është opozita, por organizimi elektoral.

G.M./b.ha./Shqiptarja.com

TAG:
• djegia e mandateve
• tualant balla