Spahiu: Amnistia për Salianjin duhet të kërkohej nga Berisha kur bëri pakt me Ramën dhe jo mbas ‘pilafit’

Juristi Kreshnik Spahiu i ftuar në Report Tv ka komentuar dy kallëzimet që kanë përfunduar në SPAK, ndaj 23 deputetëve të opozitës për kaosin në seancën e së hënës, si edhe kallëzimi i opozitës ndaj 74 deputetëve socialistë për çështjen ‘Xhaçka’.

Spahiu tha në emisionin ‘Frontline’ tha se denoncimet kolektive të socialistëve apo demokratëve në SPAK janë anti-kushtetuese

“Parimisht jam kundër dy denoncimeve. Kam qenë jam dhe do mbetem që nuk mund të denoncohen deputetët e opozitës për shkak të një proteste kolektive që ata organizojnë. Ku mendoj unë se ka vepra penale. Nëse kryhen veprime fizike, si sot veprimi fizik i pengimit të deputetëve, qoftë i deputetëve demokratë që s’janë përjashtuar, qoftë i deputetëve socialistë përmes pengesës fizike, kemi të bëjmë me vepër penale. Goditja fizike ndaj një përfaqësuesi të Kuvendit është vepër penale, denoncimi se këta në mënyrë simbolike kanë djegur karriget gjykoj se nuk është vepër penale.

Sa i përket votimeve që marrin në procesin e ligjbërjes, Baçi apo çdo deputet tjetër, nuk mbajnë përgjegjësi penale për votimin pro apo kundër një ligji. Denoncimi që i është bërë deputetëve të PS s’ka bazë ligjore dhe është antikushtetues. Të dyja denoncimet kanë qëllim politik. Socialistët janë të bindur që nga konfrontimi fizik ata firojnë politikisht dhe publikisht. Përmes të gjitha mjeteve që përdoren, demokratët bien viktimë e specialistëve socialistë në Kuvend”, tha Spahiu.

Juristi Kreshnik Spahiu thotë në Report Tv se protestat radikale e forcojnë Partinë Demokratike brenda llojit të vet. Në emisionin ‘Frontline’, Spahiu thotë se protestat radikale të PD nuk ndikojnë në elektoratin gri.

"Nuk mendoj që me këtë lloj mënyrë proteste, PD rritet tek elektorati gri. Ruan votat e demokratëve, por a i rrit votat tej demokratëve? Unë them jo. Rinia e sotme, studentët e sotëm nuk janë studentë që mbështesin djegien e karrigeve as këmbët e karrigeve ndaj një gruaje në kuvend. Nuk janë forma që lartësojnë profilin e demokratëve. Koha do tregojë në maj 2025 nëse kanë zgjedhur mënyrën e drejtë apo të gabuar, unë mendoj se kjo rrugë s’do t’i rrisë jashtë llojit të tyre", tha Spahiu në Report Tv. 

Juristi Kreshnik Spahiu ka sjellë në vëmendje figurën e Pjetër Arbnorit, ndërsa po komentonte në Report Tv djegien e karrigeve të Kuvendit nga deputetët e PD. Spahiu tha në emisionin ‘Frontilne’ se Arbnori vuajti 30 vjet në burgje, por nuk dogji karriget e Kuvendit socialist në 1991.

"Protestat e forcojnë PD brenda llojit, protesta në stilin e vet është mjeti kryesor që Berisha ka dominuar mbi rivalët e tij, mbi kritikët e tij brenda spektrit të djathtë dhe që ka mundur 34 vjet të mbajë domain e liderit të krahut të djathtë. Kur është dukur si do sfumohet, Berisha ka luajtur strategjinë e protestave për t’u shndërruar në qendër graviteti opozitar. Jashtë llojit të vet elektorati gri nuk i bashkohet këtij reagimi. PD po mundohet të alternojë protestën e rrugës me aksionin radikal në Kuvend. Unë jam rritur në protestë, kam qenë pjesë e organizimeve kundër çdo kryeministri. Një nga idhujt e mi politikë ka qenë Arbori, se është nga të vetmit parlamentarë që vinte nga 30 vite vuajtje dënimi për shkak të bindjeve politike, por edhe Arbnori që vuajti 30 vite në burgjet e komunizmit nuk dogji karriget e kuvendit. Kuvendi i ‘91-‘94 ka qenë i një standardi shumë të lartë dhe i një niveli të elitave politike shumë të më lartë krahasuar me nivelin sot", tha Spahiu.